Әл-Фараби атындағы Қазақ ұлттық университеті Алматыдағы Өмірбек Жолдасбеков атындағы Студенттер сарайының ғимаратында нысанды қайта жаңарту аясында шатырды жоспарлы түрде бұзу жұмыстары жүргізілгенін мәлімдеді, деп хабарлайды Almaty.news ақпарат агенттігі.
Бұған дейін әлеуметтік желілерде түнгі уақытта түсірілген бейнежазбалар тарап, онда ғимарат шатырының зақымдалғаны көрінген. Куәгерлер қатты дүбір естілгенін де айтқан.
Әл-Фараби атындағы ҚазҰУ баспасөз қызметі жұмыстар жоспар бойынша атқарылғанын түсіндірді.
— 2026 жылғы 23 қыркүйекте түнгі уақытта Ө. А. Джолдасбеков атындағы Студенттер сарайы ғимаратының шатырын бұзу бойынша жоспарлы жұмыстар жүргізілді. Қауіпсіздікті қамтамасыз ету және оқу процесіне кедергі жасамау үшін барлық жұмыс түнгі уақытта орындалды. Мердігерлер қауіпсіздік шараларын толық сақтады. Зардап шеккендер жоқ, — деді жоғары оқу орнының баспасөз қызметі.
Осылайша, ҚазҰУ ғимарат шатырының өздігінен құлағаны туралы болжамдарды жоққа шығарды.
Бұған дейін университет Студенттер сарайы кешенді қайта жаңартуға дайындалып жатқанын хабарлаған болатын.
Жұмыстың жеке блогы шатырға қатысты: жоба қазіргі жабынды, жылу оқшаулағышты және ілеспе қабаттарды бұзып, кейіннен жаңа шатыр жүйесін орнатуды көздейді.
Студенттер сарайының құрылысы 1985 жылы басталып, 1998 жылы аяқталған. Шамамен 30 жыл пайдалану барысында ғимарат күрделі жөндеу мен қайта жаңартудан өтпеген. 2023 жылы жүргізілген сараптамалық тексеру көтергіш құрылымдарда бірқатар ақау мен зақымды, соның ішінде металл шатыр құрылымдарының коррозиясы мен жергілікті деформациясын анықтаған.