23 мамырдан бастап Алматыда Уәлиханов, Жуков және Манаев көшелерінің жекелеген учаскелерінде бір бағытты қозғалыс енгізіледі, деп хабарлайды Almaty.news ақпарат агенттігі.
Қалалық жол қозғалысын және жолаушылар көлігін ұйымдастыру басқармасының мәліметінше, Уәлиханов көшесі Қабанбай батыр мен Қазыбек би көшелерінің аралығында бір бағытты болды — қозғалыс солтүстік бағытта ұйымдастырылды. Сонымен қатар, Жуков пен Манаев көшелері Затаевич пен Ахмедьяров көшелерінің аралығында өзгерді: Жуков көшесімен қозғалыс оңтүстік бағытта, ал Манаев көшесімен солтүстік бағытта жүзеге асырылады.
Бұл шешім қалалық полиция департаментінің әкімшілік полиция басқармасымен бірлесіп қабылданды. Мақсаты — көлік жүктемесін азайту, көше-жол желісінің өткізу қабілетін арттыру және жолдардағы қақтығыс жағдайларының санын қысқарту.
Ведомство өкілдері өзгерістер ағымдағы көлік жағдайын талдау және аудан тұрғындарының өтініштері негізінде енгізілгенін атап өтті. Бір бағытты қозғалыс пилоттық режимде іске қосылады. Тиімділігін бақылау қорытындысы бойынша осы учаскелерде жол қозғалысын ұйымдастыруға қатысты кейінгі шешімдер қабылданады.
Бұған дейін Алматы әкімдігі бірқатар көшеде бір бағытты қозғалыс енгізу жоспары туралы хабарлаған болатын.
Дереккөз: Inform.kz