Алматыда стратегиялық маңызы бар әскери өндірістік цех толық жаңғырту мен күрделі жөндеуден өтіп, салтанатты түрде ашылды. Бұл бірегей кәсіпорын 1983 жылдан бері жұмыс істеп, әскери техниканы, оптикалық аспаптар мен заманауи байланыс құралдарын қалпына келтіруде маңызды рөл атқарады, деп хабарлайды Almaty.news ақпарат агенттігі.
Цех мамандары ақаулы автоматтар мен ауыр жүк көліктерін жөндеуден бастап, қорғаныс өнімдерінің кең спектрін шығаруға дейінгі күрделі міндеттерді атқарады. Соңғы жылдары кәсіпорын Қазақстанның алты шекара бөлімін толық бейнебақылау жүйелерімен жабдықтап, ел шекарасын цифрландыруға белсенді үлес қосты. Ашылу салтанатына ҚР ҰҚК Шекара қызметінің басшылығы, әртүрлі құқық қорғау органдарының өкілдері және ардагерлер қатысты.
«Біздің өнімдерімізбен Қазақстан Республикасы бойынша барлық бөлімдер қамтамасыз етіледі. Мұнда инженерлік құрылыстар мен бөгеттер, мысалы, металл бақылау мұнаралары, жылыту пункттері, профильдеушілер және басқа да қажетті өнімдер жасалады», — деді өндіріс басшысы Мұрат Әбдірахманов.
Жаңартылған цех ішінде бүкіл өндірістік цикл шоғырланған, бұл әр кезеңде сапаны қатаң бақылауға мүмкіндік береді.
«Біз парақ материалын аламыз, содан соң одан дайын өнім жасаймыз. Сондай-ақ мұнда кәсіби бояу жүргізіледі. Барлық бұйымдар ең жоғары сапа мен ұзақ мерзімділікке қол жеткізу үшін арнайы полимерлі үш компонентті бояумен қапталады», — деп түсіндірді инженер Василий Ковтун.
Цехтың ашылуымен қатар, техникалық базаның ауқымды жаңаруы да маңызды оқиға болды. Салтанатты шара барысында әскери жүргізушілерге 27 жаңа көліктің кілттері табысталды. Ведомство басшылығы автопарктің толығуы шекара бөлімдерінің ұтқырлығын арттырып, мемлекеттік шекараны күзету бойынша қызметтік-жауынгерлік міндеттердің жедел орындалуына ықпал ететінін атап өтті.
«Шекара қызметінің басшылығына жыл сайын автопаркімізді жаңартып, бөлімдерді қолдап отырғаны үшін зор алғыс білдіремін. Үлкен рахмет!» — деді аға техник Магоммед Османов.
Дереккөз: Almaty.tv