Қазақстан Энергетика министрі Ерлан Ақкенженов Алматыдағы ЖЭО-2 және ЖЭО-3 құрылыс алаңдарына барып, станцияларды табиғи газға ауыстыру жобаларының барысымен танысты, деп хабарлайды Almaty.news ақпарат агенттігі.
ЖЭО-2-де жалпы құрылыс дайындығы 92%-ға жетті. Технологиялық жабдықты жеткізу толығымен аяқталды, алаңда 1,5 мыңға жуық маман және 140-тан астам құрылыс техникасы жұмыс істейді. Министр құрылыс қарқынын сақтау міндетін қойып, мердігер ұйымдарға қосымша мамандарды, оның ішінде монтажшылар мен дәнекерлеушілерді тартуды және іске қосу-реттеу жұмыстарына қажетті құжаттаманы келісу рәсімдерін жеделдетуді тапсырды.
Министрліктің айтуынша, ЖЭО-3 тексеру қорытындысы бойынша бекітілген кестеден айтарлықтай артта қалу анықталды. Нысанның жалпы дайындығы шамамен 26%-ды құрайды. Алаңда негізгі жабдықты жеткізуде кідірістер бар, ал нақты жұмысшылар саны жоспарланған 1 600 адамның орнына 600 адамнан аспайды. Бұл станцияның бірқатар негізгі нысандарында, оның ішінде тарату құрылғысы мен басқару жүйелерінде құрылыс-монтаж жұмыстарының мерзіміне әсер етеді.
Объективті мерзімдер бекітілген, ешқандай ауыстыру талқыланбайды! Кадр тапшылығын дереу жоюды және құрылыстағы арнайы техника көлемін бірнеше есе арттыруды талап етемін, — деді Ерлан Ақкенженов.
Сондай-ақ жабдықты жеткізуді жеделдету бойынша толық шаралар қабылдау, жобаның белгіленген мерзімдерін міндетті түрде сақтай отырып, жұмыс өндірісінің кестесін жаңарту тапсырылды.
Егер алдағы апталарда артта қалған нысанда ресурстар толығымен жұмылдырылмаса, тапсырыс берушілер мен мердігерлерге қатаң өндіріп алу шаралары қолданылады, — деді министр.
Дереккөз: Inform.kz