Алматыда «Жасыл ел» жастар еңбек отрядтарының жаңа маусымы басталды. 2026 жылы жоба аясында 2100 жасөспірім мен жас адамды жұмысқа орналастыру жоспарлануда. Бұл туралы өңірлік коммуникациялар алаңында Алматы қаласы Жастар саясаты басқармасының басшысы Әзіз Қажденбек мәлімдеді, деп хабарлайды Almaty.news ақпарат агенттігі.
Спикердің айтуынша, Алматы бүгінде елдегі ең жас қала болып табылады. Жастар саны 769 мыңнан астам адамды құрайды. Оның ішінде 472,8 мыңы – жұмыс істейтін жастар, 307,8 мыңнан астамы – жоғары оқу орындары мен колледж студенттері, шамамен 80 мыңы – жоғары сынып оқушылары.
«Жасыл ел» жобасы 2005 жылдан бері жүзеге асырылып келеді және экологиялық мәдениетті қалыптастыруға, еңбек дағдыларын дамытуға және жастарды қоғамдық пайдалы іс-әрекетке тартуға бағытталған.
«Мемлекет басшысы Қасым-Жомарт Тоқаев жастарды қолдауға және экологиялық жауапкершілікті қалыптастыруға ерекше көңіл бөледі. «Жасыл ел» жобасы «Таза Қазақстан» жалпыұлттық бастамасының міндеттеріне тікелей сәйкес келеді және жастарды қаланы дамытуға тартуға көмектеседі», – деп атап өтті Әзіз Қажденбек.
Спикердің хабарлауынша, 2025 жылы Алматы «Жасыл ел» жобасын іске асыру бойынша еліміздің үздік өңірі деп танылған. Өткен маусымда бағдарлама аясында 2,1 мың жас жұмысқа орналастырылды. Алғаш рет жоғары оқу орындарының студенттерімен қатар колледж студенттері мен NEET санатындағы жастар да жобаға қатысты.
Алматы қаласы бойынша «Жасыл ел» жобасының жетекшісі Ердәулет Жүнісбектің айтуынша, жастар еңбек отрядтары жыл сайын қаланы көгалдандыруға, аумақтарды санитарлық тазалауға, қоғамдық кеңістіктерді абаттандыруға және экологиялық акцияларға қатысады.
«Көптеген қатысушылар үшін жоба еңбек тәжірибесін алудың, қоғамдық қызметте өзін көрсетудің және Алматының дамуына үлес қосудың алғашқы мүмкіндігіне айналады», – деп атап өтті Ердәулет Жүнісбек.
Жобаға 14 пен 35 жас аралығындағы оқушылар, студенттер және жұмыссыз жастар қатыса алады. Барлық қатысушылар «Жасыл ел» арнайы формасымен қамтамасыз етіледі.
«Біздің міндетіміз – жастарды уақытша жұмыспен қамту ғана емес, сонымен қатар белсенді азаматтық ұстанымды, экологиялық мәдениетті және қалалық ортаға деген жауапкершілік сезімін қалыптастыру», – деп атап өтті Әзіз Қажденбек.
Ердәулет Жүнісбектің сөзіне қарағанда, еңбек маусымы 30 қыркүйекке дейін жалғасады, ал «Жасыл ел» жаңа маусымының салтанатты ашылуы 2 маусымда өтеді.
Жобаға қатысуға өтінімді Сериков көшесі, 6а/1 мекенжайы бойынша офлайн форматта беруге болады. Қатысу үшін оқушылар оқу орны бойынша әлеуметтік педагогқа да жүгінуі қажет.
Жастар саясаты басқармасы биыл жастарды қамту аясын кеңейту және «Жасыл ел» бойындарының қатысуымен экологиялық және қоғамдық бастамалардың санын арттыру жоспарланып отырғанын атап өтті.
Дереккөз: Almaty.tv