Алматыда өздерін ұйымдасқан қылмысқа қарсы күрес басқармасының қызметкерлерімін деп таныстырып, ақша талап еткен төрт күдікті ұсталды, деп хабарлайды Almaty.news ақпарат агенттігі.
Ішкі істер министрлігінің мәліметінше, 10 тамызда бір топ адам жәбірленушіні бақылап, одан кейін өздерін ҰҚҚК қызметкерлері ретінде таныстырып, тапаншамен қорқытып, көлікке отырғызып, қала сыртына алып шыққан.
Қысым көрсетілген жәбірленуші туысына қоңырау шалған, ол қылмыскерлер көрсеткен нөмірге 3 млн теңге аударған.
Ұйымдасқан қылмысқа қарсы күрес басқармасының қызметкерлері қылмыс жасады деген күдікпен бұрын сотталған төрт адамды ұстады. Олардың біреуі бұрын кісі өлтіргені үшін жазасын өтеген.
Барлық күдікті уақытша ұстау изоляторына қамалды.
Тінту барысында екі мылтық, карабин, газ тапаншасы және оқ-дәрілер тәркіленді.
Тергеу жалғасуда.
ІІМ сондай-ақ Ақтөбе облысындағы ұқсас қылмыстық іс туралы хабарлады. Онда бұрын сотталған жергілікті тұрғын ұсталған, тергеу деректері бойынша ол да ҰҚҚК қызметкерімін деп таныстырып, шантаж және психологиялық қысым арқылы азаматтардан ақша талап еткен.
Ведомство қазақстандықтарды құқық қорғау органдарының қызметкерлерімін деп таныстыратын адамдардың қорқытуына бой алмауға және дереу полицияға жүгінуге шақырды.
Бұған дейін Жамбыл облысында шекара бекетінен өткен жүргізушілерден жүйелі түрде ақша талап еткен топтың қызметі тоқтатылғаны хабарланған болатын.