Алматыда республикалық «Таза Қазақстан» акциясы мен «Мөлдір бұлақ» экологиялық бастамасы аясында 10 орында жергілікті сенбіліктер өтті. Шаралар қаланың 8 ауданын қамтыды, деп хабарлайды Almaty.news ақпарат агенттігі.
Қалалық Коммуналдық инфрақұрылымды дамыту басқармасының мәліметінше, сенбіліктерге 5 520 адам қатысып, 192 бірлік арнайы техника жұмылдырылды. Жұмыс барысында 588 м³ қоқыс пен қалдық шығарылып, 210 ағаш отырғызылды, оның ішінде 110 шынар және 100 қарағаш бар.
Сенбіліктер қала инфрақұрылымының негізгі нысандарын — қоғамдық кеңістіктерді, аула аумақтарын және жағалау аймақтарын қамтыды. Тазалау және абаттандыру жұмыстары Аханов көшесінің бойындағы Ақбұлақ шағынауданында, Төле би – Абылай хан – Бөгенбай батыр – Панфилов көшелерінің квадратында, Сайран шағынауданында, Қырмызы көшесінде, «Гүлдер» саябағында және Айнабұлақ шағынауданында, Үлкен Алматы каналы мен Халиулин көшесінің бойында, Таутаған көшесіндегі учаскеде, сондай-ақ «Желтоқсан» саябағында жүргізілді.
Шаралар экологиялық ахуалды жақсартуға, халықтың санитарлық мәдениетін арттыруға және қоршаған ортаға ұқыпты қарауды қалыптастыруға бағытталған.
Дереккөз: Almaty.tv