Алматыда белгіленген талаптарға сәйкес келмеген 146 автокөлік жуу орны сумен жабдықтау желісінен ажыратылды, деп хабарлайды Almaty.news ақпарат агенттігі.
Қала әкімдігінің мәліметінше, мегаполисте жүздеген шақырым инженерлік желілер жаңғыртылып, автокөлік жуу орындарына бақылау күшейтілуде. Биыл сумен жабдықтау желілерінің тозуын 49%-ға, ал су бұру желілерінің тозуын 48%-ға төмендету жоспарланған.
Сонымен қатар қалада коммуналдық нысандардың цифрлық бақылау жүйелері енгізіліп, суды ұтымды пайдалану үшін автокөлік жуу орындарына қойылатын талаптар қатаңдатылуда. Бұл туралы Алматы қалалық энергетика және сумен жабдықтау басқармасының басшысы Нұрбақыт Серікбай өңірлік коммуникациялар қызметіндегі баспасөз мәслихатында мәлімдеді.
«Қазір қалада кезекті жөндеу маусымы басталды. 2026 жылы тағы 339,1 км сумен жабдықтау желілерін салып, жаңғыртуды жоспарлап отырмыз. Бұл тозу деңгейін қосымша 49%-ға төмендетіп, қала тұрғындары үшін коммуналдық инфрақұрылымның сенімділігін арттырады. Жұмыс Алматының барлық аудандарында жүйелі түрде жүргізілуде», — деді Нұрбақыт Серікбай.
Тағы бір бағыт — су ресурстарын ұтымды пайдалану. Серікбайдың айтуынша, Алматыда автокөлік жуу орындарына қайта сумен жабдықтау жүйелерін енгізу жалғасуда. Бүгінгі таңда мұндай жүйелер 162 нысанға орнатылған, оның 33-і биылғы жылдың басынан бері іске қосылды.
«Сонымен қатар барлық автокөлік жуу орындары деректерді жіберетін заманауи су есептегіш құралдармен жабдықталған. 2026 жылғы 1 мамырдағы жағдай бойынша белгіленген талаптарға сәйкес келмегені үшін қалада 146 автокөлік жуу орны ажыратылды», — деп хабарлады Серікбай.
Автокөлік жуу орындарындағы қайта сумен жабдықтау ресурстарды тұтынуды және қалалық жүйеге түсетін жүктемені айтарлықтай төмендетуге мүмкіндік береді, сондықтан бұл бағыттағы бақылау жалғасады.
Дереккөз: Nur.kz