Алматы полицейлері шетелдік туристерге адал емес такси жүргізушісі заңсыз иемденген ақшаны қайтаруға көмектесті, деп хабарлайды Almaty.news ақпарат агенттігі.
Полиция департаментінің мәліметінше, Үндістанның екі азаматы құқық қорғау органдарына Алматы халықаралық әуежайынан қаланың жоғарғы бөлігіне дейінгі сапардан кейін жүгінген. Олардың айтуынша, жүргізуші жол жүру үшін 150 АҚШ долларын талап етіп, бағаны айтарлықтай көтеріп жіберген.
Туристердің өтінішінен кейін полиция қызметкерлері жедел түрде жүргізушінің жеке басын анықтады. Заңсыз алынған ақша шетелдік азаматтарға толық көлемде қайтарылды.
Такси жүргізушісіне қатысты әкімшілік материал жиналып, ол процессуалдық шешім қабылдау үшін әкімшілік құқық бұзушылықтар жөніндегі мамандандырылған ауданаралық сотқа жіберіледі.
Полицияда жолаушылардың, оның ішінде шетелдік қонақтардың есебінен заңсыз баюдың кез келген әрекеті қатаң құқықтық баға алатынын атап өтті.
Такси қызметтеріне қатысты мәселелер жүргізушілер мен жолаушылар арасында жиі дау туғызады. Бұған дейін Kazinform агенттігі салонның химтазалауын кім төлейтіні, жүргізуші үй жануарын тасымалдаудан бас тарта ала ма және жолаушының автомобильде өз музыкасын қосуға құқығы бар ма деген мәселелерді қарастырған.
Дереккөз: Inform.kz