Алматыда қоғамдық көлікпен жүретін жолаушылар саны 2030 жылға қарай шамамен 64%-ға өседі. Бұл көрсеткіш қаланың бас жоспарын түзету кезінде де сақталып отыр, деп хабарлайды Almaty.news ақпарат агенттігі.
Бұл туралы «Алматыгенплан» ғылыми-зерттеу институтының жетекшісі Асхат Садуов мәслихат депутаты Садир Хамраевтың Алматының көлік жүйесін дамыту туралы сауалына жауап бере отырып мәлімдеді.
Асхат Садуовтың түсіндіруінше, негізгі міндеттердің бірі – қоғамдық көлікті қолайлы ету, сондай-ақ тұрғындардың жеке көліктерін сирек пайдаланып, жолға аз уақыт жұмсауына мүмкіндік беру.
Ол үшін аудандар арасындағы бағыттарды дамыту, қолайлы ауысып отыруды ұйымдастыру және әр жолы қала орталығы арқылы өтпей-ақ жүріп-тұруға мүмкіндік беретін көлік байланыстарын құру қарастырылған.
Халық санының болжамы нақтыланған кезде жолаушыларды тасымалдау қажеттілігі де қайта есептеледі.
Көлік жүйесін дамыту нәтижелерін жолға кететін уақыт, қоғамдық көліктің қозғалыс жылдамдығы және аудандар арасындағы қатынастың қолайлылығы бойынша бағалау жоспарланып отыр.