Алматының Алмалы ауданында үш қабатты мейрамхана ғимаратына қосылып салынған пиццерияда өрт болды. Өртті жедел сөндіріп, негізгі ғимаратқа таралуына жол берілмеді, деп хабарлайды Almaty.news ақпарат агенттігі.
Қалалық ТЖД мәліметінше, Төле би көшесінде орналасқан мекемеде түтіндеу туралы хабарлама бүгін түскен. Оқиға орнына келген өрт сөндірушілер қойма бөлмесінің жанып жатқанын және от пиццерияның шатырына ауысқанын анықтады. Құтқарушылар келген кезде мекемеде келушілер болмаған.
Жасырын өрт ошақтарын іздеу үшін ТЖМ қызметкерлері бензорездердің көмегімен шатыр құрылымдарын ашты. Өрт сөндірушілердің жедел әрекеттерінің арқасында түтін деңгейін төмендетіп, оттың мейрамхана ғимаратына одан әрі таралуын болдырмау мүмкін болды.
Өрт толығымен сөндірілді. Оқиға салдарынан ешкім зардап шеккен жоқ. Өрттің себептері анықталып жатыр.
Дереккөз: Inalmaty.kz