Алматыда ондаған отбасы ақысын төлеп қойған баспанасынан айырылып қалуы мүмкін екенін мәлімдеді. Үлескерлердің айтуынша, олар таунхаустарды құрылыс сатысында сатып алған, алайда кейін жылжымайтын мүліктің бір бөлігі басқа адамдарға қайта сатылғаны, ал кейбір нысандар банкте кепілде тұрғаны белгілі болды, деп хабарлайды КТК телеарнасы, деп хабарлайды Almaty.news ақпарат агенттігі.
Тұрғындардың айтуынша, тұрғын үй кешенінің құрылысы 2021 жылы басталған. Сол кезде пәтерлер 40-тан 70 млн теңгеге дейінгі бағамен сатылған. Көптеген сатып алушы ипотека рәсімдеп, жеке жинақтарын салған немесе бұрынғы баспанасын сатып, жақын арада жаңа үй аламыз деп үміттенген.
Кейбір үлескерлер кілттерін алып үлгеріп, тіпті жөндеу жұмыстарын бастаған. Алайда кейін бұрын рәсімделген келісімшарттар оларға меншік құқығын бермегені, ал жекелеген пәтерлер басқа тұлғаларға тіркелгені анықталған.
Сатып алушылардың бірінің айтуынша, ол таунхаусты 52 млн теңгеге сатып алып, жөндеуге шамамен 30 млн теңге жұмсаған. Кейін әйел баспананың меншік иесі болып басқа адам саналатынын білген, оған осы кешендегі бірнеше пәтер рәсімделген көрінеді.
Жағдайдың шешілуін күтпей, отбасылардың бір бөлігі аяқталмаған үйлерге көшіп кірген. Тұрғындар коммуникацияларды өздері қосқан, алайда су мен электр энергиясын заңды тұлғаларға арналған тарифтер бойынша төлейді, соның салдарынан ай сайынғы төлемдер, олардың айтуынша, 250-300 мың теңгеге жетеді.
Үлескерлердің адвокаты сатып алушылармен жасалған келісімшарттар алдын ала сипатта болғанын түсіндірді. Құрылыс аяқталғаннан кейін құрылыс салушы нысандарға құжаттарды рәсімдеп, пәтерлердің бір бөлігін басқа тұлғаларға тіркеген, ал 22 нысан банкте кепілде қалған.
Зардап шеккендер полицияға жүгінген. Алматы полиция департаменті ерекше ірі мөлшердегі алаяқтық фактісі бойынша қылмыстық іс тергеліп жатқанын хабарлады. Құқық қорғау органдарының мәліметінше, құрылыс компаниясының үш қызметкері күдікті деп танылып, сот шешімімен қамауда отыр.
Егер олардың кінәсі дәлелденсе, фигуранттарға мүлкін тәркілеумен 10 жылға дейін бас бостандығынан айыру жазасы қауіп төндіруі мүмкін.