Алматыда электр желісіндегі апатқа байланысты Орталық көшесінің 36-үйінің тұсында, тікелей жүріс бөлігінің астында жөндеу жұмыстары жүргізіледі. Осыған байланысты Қ. Салықов көшесінен Жәңгір хан көшесіне дейінгі аралықта қозғалыс шектеледі, деп хабарлайды Almaty.news ақпарат агенттігі.
«Алатау Жарық Компаниясы» АҚ мәліметінше, жолды ашу шұғыл жөндеу қажеттілігінен туындады. Бұл желі Алматыны айнала орналасқан 220 кВ кернеулі сақиналы электрмен жабдықтау желісінің «Ерменсай» және «Бесағаш» қосалқы станциялары арасындағы бөлігіне кіреді.
Желілердің бірінің зақымдануы сақинаның ажырауына және энергия жүйесінің қалған элементтері арасында жүктеменің қайта бөлінуіне әкелді. Қазіргі уақытта желі мәжбүрлі ажыратылған схема бойынша жұмыс істеп тұр.
Қазақстанның ірі энергия беру компаниясының хабарлауынша, энергия жүйесін қалыпты режимге қайтару және технологиялық бұзылыстың дамуын болдырмау үшін зақымдалған учаскені қысқа мерзімде қалпына келтіру қажет. Кабель жүріс бөлігінің астынан өтетіндіктен, мамандар оған қазба жұмыстарынсыз қол жеткізе алмайды.
Сондай-ақ, апаттық-қалпына келтіру жұмыстары тәулік бойы жүргізілетіні хабарланды.
«Алатау Жарық Компаниясы» АҚ жөндеуді барынша жылдам аяқтау және қозғалысты шектеу мерзімін қысқарту үшін шаралар қабылдап жатыр. Жұмыстар аяқталған соң жол жамылғысы толық көлемде қалпына келтіріледі.
Компания алматылықтар мен қала қонақтарынан маршруттарды жоспарлау кезінде шектеулерді алдын ала ескеруді және қала мен Алматы агломерациясының сенімді электрмен жабдықтау схемасын қалпына келтіру үшін қажетті мәжбүрлі шараларға түсіністікпен қарауды сұрайды.
Бұған дейін Алматыда жаңбыр мен LRT құрылысының салдарынан асфальт құлағаны белгілі болды.