Алматыда пластикалық хирург шетелдік маманды шақырып, операцияны қонақүйде жасаған. Нәтижесінде пациенттің бетіне имплантталған сүйек жабыспай, косметикалық ақау пайда болған, деп хабарлайды Almaty.news ақпарат агенттігі.
Бұл туралы Алматы қаласы бойынша Медициналық және фармацевтикалық бақылау комитеті департаментінің басшысы Дәмір Дәулетбаев РСК брифингінде мәлімдеді. Оның айтуынша, қалада жыл сайын пластикалық процедураларға қатысты шағымдар тіркеледі.
Спикер екі мысал келтірді. Бірінші жағдайда ана мен балаға сүйек трансплантациясы жасалған, бірақ материал жабыспай қалған. Операцияны көрші елден келген пластикалық хирург жүргізген. Екінші жағдайда да сүйек трансплантациясынан кейін жабыспау орын алған.
«Бізде бір жағдай болды, маманды шетелден шақырды, ол қонақүйде операция жасады. Сүйекті трансплантациялады, бірақ ол жабыспай, әйелдің бетінде косметикалық ақау қалды. Ол зардап шегіп, психологиялық проблемаларға тап болды. Бірақ тексеру жүргізе алмаймыз, өйткені келісімшарт жоқ, бұл хирургтің операция жасағаны туралы ешқандай құжат жоқ», — деп түсіндірді Дәулетбаев.
Дәулетбаев мұндай жағдайларды болдырмау үшін бірнеше ұсыныс берді. Ол клиниканың пластикалық операциялар, дерматокосметология немесе басқа медициналық қызметтерге лицензиясын тексеруді сұрады.
«Міндетті түрде дәрігер немесе медбике сертификатқа ие болуы керек. Дәл сол мамандық бойынша, қандай қызмет көрсетсе, соған сәйкес. Өкінішке қарай, тексеру кезінде медициналық ұйым нақты бір дәрігерге лицензия алғаны, содан кейін онымен келісімшарт бұзылғаны анықталады. Ал сол дәрігердің медициналық қызмет көрсетуге қатысы мен рұқсаты болмаса да, ол қызмет көрсетеді», — деді спикер.
Дәулетбаев шетелден келетін мамандардың да дипломын Қазақстанда растатуы керектігін атап өтті. Тексеруден кейін маман Медициналық және фармацевтикалық бақылау комитетіне дипломды растау туралы сертификат беріп, қызметке рұқсат ала алады. Сондай-ақ ол операция алдында келісімшарт жасасу қажеттігін еске салды.
Дереккөз: Nur.kz