Алматыда кене маусымы әдеттегіден ерте басталып, дәрігерлер тұрғындарды сақ болуға шақырып жатыр. Тек соңғы екі аптада кене шаққан 500-ге жуық адам медициналық көмекке жүгінген, деп хабарлайды Almaty.news ақпарат агенттігі.
Маусым басталғалы кене шағудан зардап шеккендер саны 1142 адамға жеткен, бұл өткен жылдың дәл осы кезеңімен салыстырғанда 20%-ға артық. Мамандардың пікірінше, мұның себебі — ерте жылыну, соның салдарынан қауіпті жәндіктер ерте белсенділік танытқан.
«Қаланың травматологиялық пункттеріне келгендердің барлығына уақтылы жедел медициналық көмек көрсетілді, қажет болған жағдайда кенеге қарсы иммуноглобулин егілді. Бүгінгі күнге дейін кене инфекцияларымен ауыру жағдайлары тіркелген жоқ», — деп хабарлады Алматы қалалық жедел медициналық жәрдем станциясы.
Алайда мамандар сақтықты босаңсытпауға кеңес береді. Кене шағуын бірден байқау мүмкін емес, ал симптомдар бірнеше күннен кейін ғана пайда болады. Сондықтан серуеннен кейін денені мұқият тексеру керек, әсіресе құлақ, мойын және қолтық асты аймақтарына назар аударған жөн. Кене теріге жабысқанда әрқашан тері жұқа жерлерді таңдайды, ал оның шағуын сезбеуіңіз де мүмкін.
«Егер денеңізден қауіпті жәндікті тапсаңыз, оны өз бетіңізше алып тастауға тырыспаңыз. Мүмкіндігінше тезірек дәрігерге қаралыңыз», — дейді мамандар.
Дәрігерлердің айтуынша, күн сайын кене шаққан беске дейін адам келеді. Негізінен бұл — тауға шығатын немесе бақшада жұмыс істейтін белсенді қала тұрғындары. Кене шаққан жағдайда мамандар кене энцефалитіне қарсы иммуноглобулинді дереу егеді, бірақ оны алғашқы үш күн ішінде жасау маңызды.
«Біз кенені талдауға жібермейміз, өйткені талдау бес-жеті күнге созылады. Ал иммуноглобулинді тек шаққаннан кейінгі алғашқы үш күнде егуге болады. Сондықтан талдау нәтижесін күтпейміз. Бесінші тәулікте иммуноглобулинді егуге болмайды — бұл вирустық инфекцияны күшейтуі мүмкін», — деп түсіндірді Алматы қалалық №7 клиникалық ауруханасының травматолог-дәрігері Дмитрий Ким.
Қазір Алматыда кенеге қарсы екінші кезеңдік өңдеуге дайындық жүріп жатыр.
Дереккөз: Nur.kz