Алматыда қалалық әкімдіктердің, питомниктер мен бақ өсіру орталықтарының, сәулетшілердің, урбанистердің, ландшафт мамандарының, ғалымдардың және түрлі елдердің компанияларының өкілдерін біріктірген халықаралық конференция басталды, деп хабарлайды Almaty.news ақпарат агенттігі.
Биыл алаңда 15 елден 80-нен астам экспонент ұсынылған, ал көрме питомник шаруашылығына, көгалдандыруға және қоғамдық әрі жеке кеңістіктерді абаттандыруға арналған.
Алматы үшін мұндай іс-шараны өткізу практикалық тәжірибе алмасуға және қалалық орта үшін заманауи шешімдермен танысуға мүмкіндік береді. Бағдарламада жасыл кеңістіктерді жобалау және оларды ұстау, климаттық жағдайларды ескере отырып өсімдіктерді таңдау, суару жүйелері мен жаңбыр суын сақтау, сондай-ақ тұрақты қоғамдық кеңістіктерді құру тәсілдері қарастырылған.
Бағдарламаның жеке бөлігі практикалық оқытуға арналған. Қалалық көгалдандыруды басқару жөніндегі мамандар үшін мердігерлермен жұмыс істеу, отырғызу материалын таңдау, өсімдіктерді отырғызу мен күту, сондай-ақ орындалған жұмыстардың сапасын бақылау мәселелері қарастырылатын интенсивтер мен семинарлар өтеді. «Ашық микрофон» форматы да қарастырылған – екі сағаттық сессия барысында қатысушылар саланың жетекші сарапшыларына сұрақ қойып, практикалық кейстерді талқылай алады.
Конференциямен қатар «Атакент» КЦДС-де Green Spaces Expo 2026 өтіп жатыр. Мұнда Қазақстан, Ресей, Германия, Нидерланд, Польша, Бельгия, Түркия, Өзбекстан, Қырғызстан, Қытай және басқа да елдердің питомниктері мен өндірушілері ұсынылған.
Бағдарламаны 25 қыркүйекте Green Expert практикалық күні қорытындылайды. Қатысушылар Алматының іске асырылған қалалық көгалдандыру нысандарын, Бас ботаникалық бақты аралап, жасыл екпелерді күту бойынша шеберлік сабақтарына қатысады.
Конференция «Атакент» КЦДС-де, «Бақшасарай» қабылдау үйінде өтіп жатыр, мекенжайы: Тимирязев көшесі, 42, 1-к.