Алматыда аты аңызға айналған «Дос-Мұқасан» ансамбліне арналған жаңа арт-нысан пайда болады, деп хабарлайды Almaty.news ақпарат агенттігі.
Қала әкімдігінің баспасөз қызметі мәлімдегендей, нысан Масанчи көшесінің Абай даңғылы мен Сатпаев көшесі аралығындағы жаңартылған бөлігінде орналасады.
Оның басты ерекшелігі – интерактивті аудиожүйе: түймені басу арқылы топтың танымал әуендерін тыңдауға болады.
Мамандардың нақтылауынша, инсталляция 1967 жылы Алматыда тарихы басталған ұжым мүшелерінің жиынтық бейнесін көрсетеді.
«Дос-Мұқасан» – 1967 жылы Алматыда Қазақ политехникалық институтының студенттері құрған аты аңызға айналған қазақ вокалдық-аспаптық ансамблі (ВИА). Ұжым қазақ фолк-рокы мен эстрадасының бастаушысы болып, ұлттық халық әндерін рок- және поп-музыка элементтерімен шебер ұштастырды. Ансамбль халықаралық деңгейде танылып, КСРО-ның қалаларында ғана емес, АҚШ, Франция, Германия, Венгрия және басқа да елдерде гастрольде сәтті өнер көрсетті. Басты хиттері: «Той жыры» (Қазақстанның басты той әні), «Бәрінен де сен сұлу», «16 қыз», «Құдаша», «Сұлу қыз», «Жыр жазамын жүрегімнен», «Ләйлім шырақ».
2026 жылғы 1 қазанда біз Алматыдағы ескі үйлердің неліктен кішкентай плиткамен қапталғанын әңгімелеген едік.