Алматыда қан донорлығы фестивалі өтуде. Ол көмегі көрінбейтін, бірақ баға жетпес адамдардың құрметіне ұйымдастырылған. Шара қалалық кардиоорталықтың бастамасымен өткізілуде, деп хабарлайды Almaty.news ақпарат агенттігі.
Таңертеңнен бастап комьюнити орталық алаңында адам көп. Мұнда дәрігерлер, еріктілер, тұрақты донорлар және алғаш рет мұқтаждарға қан тапсыруды ойлап жүргендер жиналды. Фестивальдің басты мақсаты – донорлық туралы айтып қана қоймай, бұл миссияның қазіргі медицина үшін қаншалықты маңызды екенін көрсету.
«Донорлық қанға қажеттілік үнемі бар, сондықтан мұндай акциялар, фестивальдар біз үшін өте маңызды, өйткені олар адамдардың назарын донорлық мәселелеріне аудара алады. Әсіресе сирек кездесетін қан топтары мен сақтау мерзімі шектеулі тромбоциттер сұранысқа ие. Бүгін біз 200-300 донор қабылдауды жоспарлап отырмыз», – деді қалалық қан орталығының атқарушы директоры Мұхит Көшеров.
Күн сайын донорлық қанға ауыр ота жасатқан науқастар, апаттан кейінгілер, онкологиялық аурулармен күресетіндер, сондай-ақ босанған әйелдер мен басқалар мұқтаж. Ал оны жасанды жолмен жасау мүмкін емес – жалғыз көз – адам.
«Бізге консервативті немесе дәрі-дәрмекпен емдеу ғана емес, жүрекке жабық және ашық типтегі оталар жасайтын күрделі науқастардың үлкен санаты жүгінеді, сондықтан біз қан мен оның компоненттеріне үнемі қажеттілікті сезінеміз. Әрқайсымыз біреудің сауығуына және оның ауруын жеңуіне көмектесе аламыз», – деп атап өтті қалалық кардиологиялық орталықтың директоры Ермағамбет Қуатбаев.
Көптеген қатысушылар үшін донорлық жақсы дәстүрге айналған. Кейбіреулер жылына бірнеше рет қан тапсыруға келсе, басқалары алғаш рет мейірімділік жасауға бел буып отыр.
«Біздің департамент қызметкерлері әрқашан қан тапсыруға белсенді қатысады және мұндай бастамаларды қолдайды. Бүгін біз 20 адамбыз. Әркім донорлықты өзінің азаматтық борышы ретінде қабылдауы керек деп санаймын», – деді қалалық ТЖД кадрлық және тәрбие жұмысы басқармасының инспекторы Ербол Ануарбеков.
Донорлық – бірнеше минутты ғана алатын қарапайым әрекет, бірақ ол адамға сау өмір сүруге мүмкіндік береді. Бұл фестиваль тағы бір рет еске салады: қаһарман болу үшін дауыстап сөйлеудің қажеті жоқ – тек көмек қолын созу жеткілікті.
Дереккөз: Almaty.tv