Алматыда денсаулық сақтау жүйесін жаңғырту аясында жаңа емханалар ашылып, ауруханалар қайта жаңартылуда. Бостандық ауданында өткен жылдың соңында 500 келушіге арналған жаңа емхана іске қосылды, бұл елдегі бірыңғай стандарт бойынша жұмыс істейтін алғашқы медициналық мекеме. Сонымен қатар, №4 қалалық клиникалық ауруханада шұғыл қабылдау жүйесі енгізіліп, 7 000 шаршы метрден астам аумақта жөндеу жұмыстары жүргізілді, инфаркттан кейінгі көмек көрсету орталығы ашылды, деп хабарлайды Almaty.news ақпарат агенттігі.
Жетісу ауданында 20 000 тұрғынға есептелген жаңа емхана жұмысын бастады. №12, 20, 22, 23 және 27 емханаларда, сондай-ақ №8 жедел жәрдем станциясында күрделі жөндеу жүргізілді. Түрксіб және Наурызбай аудандарында заманауи стандарттарға сай жаңа емханалардың құрылысы жалғасуда. Сейфуллин даңғылындағы №1 перзентханада қайта жаңғырту және күрделі жөндеу жұмыстары жүргізілуде.
«Түрксіб және Наурызбай аудандарында заманауи стандарттарға сай жаңа емханалардың құрылысы жалғасуда. Бұл қалалық денсаулық сақтау жүйесін дамытудағы маңызды қадам және Алматы үшін үлкен жетістік», — деді қалалық мәслихат депутаты Әкім Тұрсын.
Сәуір айында Қазақстандағы алғашқы крематорий ашылды. Жаңа кешен чехиялық жабдықпен және көп сатылы сүзгі жүйесімен жабдықталған. Кремация процедурасы шамамен екі сағатқа созылады, қызмет тек ерікті негізде көрсетіледі, құны 240 мың теңге. Қалалық патологоанатомиялық бюро қызметкері Қайыржан Исабеков екі кремациялық пеш толығымен автоматтандырылғанын, операторлар Новосібірде алты күндік оқудан өткенін айтты.
Өткен жылы Алматы жедел жәрдеміне 50 жаңа мамандандырылған көлік берілді, оның ішінде 12 С класындағы реанимобиль және 38 В класындағы санитарлық көлік. Диспетчерлік қызмет күніне шамамен 3 000 қоңырау қабылдап, бригадалар 2 500-ден астам шақыртуға шығады. Медициналық мекемелерде электронды медициналық карталар енгізіліп, дәрігерге жазылу онлайн режимде жүзеге асырылуда.
Дереккөз: Almaty.tv