Алматыда Changan маркалы кроссовер жолдан ұшып кетіп, ағашта «ілініп» қалған оқиға болды, деп хабарлайды Almaty.news ақпарат агенттігі.
Оқиға орнынан түсірілген кадрларды Instagram-дағы almatynews_kaz парақшасы жариялады. Бейнежазбада зақымданған көліктің жол бойындағы ағашқа сөзбе-сөз «ілініп» тұрғаны көрінеді.
«Қара кроссовер жоғары жылдамдықпен металл қоршауды құлатып, жолдың жүру бөлігінен жөндеу жұмыстары жүріп жатқан аймаққа ұшып шығып, жол бойындағы ағашқа кептеліп қалды», – деп жазды автор.
Оқиға бүгін Сейфуллин даңғылы мен Жамбыл көшесінің қиылысында болды. Қалалық полиция департаментінің баспасөз қызметі NUR.KZ тілшісіне бұл жол-көлік оқиғасы бүгін сағат 18:26-да Алмалы ауданында тіркелгенін хабарлады. Changan жүргізушісі Сейфуллин бойымен келе жатып, басқаруды ұстай алмаған.
Салдарынан ол кедергіге соғылып, көлік аударылған. Кроссовер жүргізушісі жарақат алып, ауруханаға жеткізілді. Болған оқиғаның мән-жайын аудандық полиция басқармасының қызметкерлері анықтап жатыр.