Алматыда Даулеткерей көшесінде көлік қозғалысы тәулік бойы ішінара жабылады. Шектеу 30 мамыр сағат 06:00-ден 1 маусым сағат 06:00-ге дейін Наурызбай ауданында, Жандосов көшесінен Әбділдин көшесіне дейінгі аралықта қолданылады, деп хабарлайды Almaty.news ақпарат агенттігі.
Бұл шара асфальтбетон жабынының жоғарғы қабатын төсеуге байланысты. Жұмыстар «Алматы қаласындағы батыс коллекторлық кәріз құрылысы» жобасы аясында қалалық энергетика және сумен жабдықтау басқармасының тапсырысы бойынша жүргізілуде.
Қала тұрғындары мен қонақтарын уақытша қолайсыздықтарды түсіністікпен қабылдап, жүру бағыттарын алдын ала жоспарлауға шақырады. Жобаның стратегиялық маңызы зор: жалпы ұзындығы 35 км болатын кәріз коллекторы Жандосов көшесінен қалалық тазарту құрылыстарына дейін салынады, — делінген хабарламада.
Жобаны іске асыру шамамен 200 мың тұрғынды орталықтандырылған су бұрумен қамтамасыз етіп, инженерлік желілердің сенімділігін арттырып, санитарлық-эпидемиологиялық жағдайды жақсартады және қала аудандарының одан әрі дамуына жағдай жасайды.
Дереккөз: Nur.kz