Алматыда жаңа автобус жолақтарын енгізу, веложолдарды ұзарту және бірнеше көшеде қозғалыс схемасын өзгерту жоспарлануда. Бұл өзгерістер кезең-кезеңімен, алдымен сынақ режимінде уақытша белгілер мен жаңа схемалар арқылы жүзеге асырылады, деп хабарлайды Almaty.news ақпарат агенттігі.
Қарастырылып жатқан шешімдердің бірі — жекелеген көшелерде бір бағытты қозғалысты енгізу. Мұндай өзгерістер Тастақ базары ауданында, сондай-ақ Әуезов — Байзақов, Жуков — Уәлиханов және Радостовец көшелерінің учаскелерінде пайда болуы мүмкін.
Сонымен қатар, мамандар Тимирязев, Жандосов, Манас, Мыңбаев, Береговая, Армянская, Айманов және Пушкин көшелерінде бір бағытты қозғалысты іске қосу мүмкіндігін зерттеуде.
Almaty Joly ұйымының мәліметінше, өзгерістердің басты мақсаты — көлік инфрақұрылымына жүктемені азайтып, қала бойынша қозғалысты ыңғайлы әрі түсінікті ету.
Биыл Алматыда велосипед инфрақұрылымын айтарлықтай кеңейту жоспарлануда. Веложолдардың ұзындығын 87 километрден 125,5 километрге дейін ұлғайтпақ.
Сонымен қатар, қоғамдық көлік үшін жаңа бөлінген жолақтарды іске қосу қарастырылуда. Bus lane жолақтары Әл-Фараби даңғылында, Тілендиев, Шевченко, Құрманғазы, Сәтбаев, Өтеген батыр, Рысқұлов көшелерінде, сондай-ақ Солтүстік айналма жолда және ВОАД-та пайда болуы мүмкін.
Almaty Joly ұйымы жол қозғалысын ұйымдастыруда басымдық қоғамдық көлікке, жаяу жүргіншілер мен велосипедшілерге берілетінін атап өтті.
Дереккөз: Inalmaty.kz