Алматыда ауа сапасын бақылау жүйесі кеңейтіледі, деп хабарлайды Almaty.news ақпарат агенттігі.
Қалалық мәслихат депутаттары 20 мобильді экологиялық станция сатып алу мәселесін қарады. Қазіргі уақытта Алматыда 16 стационарлық бақылау бекеті жұмыс істейді, бірақ олар қаланың барлық аудандарын толық қамтуға және ластанудың жергілікті көздерін жедел анықтауға мүмкіндік бермейді.
Осы мәселені шешу үшін 20 мобильді экологиялық станция сатып алу жоспарлануда. Олардың басты артықшылығы — қаланың кез келген нүктесіне орналастыру және нақты уақыт режимінде деректер алу мүмкіндігі.
Жаңа станциялар ауа сапасының қай жерде және қандай себептермен нашарлайтынын анықтауға көмектеседі: көлік жүктемесі, өнеркәсіптік нысандардың жұмысы немесе жеке секторда қатты отынды пайдалану салдарынан.
Алынған деректер нақты шешімдер қабылдауға негіз болады. Атап айтқанда, ластану көздерін бақылауды күшейту, жол қозғалысын ұйымдастыруды жетілдіру, қоғамдық көлікті дамыту, шығарындылар деңгейі төмен аймақтарды (LEZ) енгізу, сондай-ақ жекелеген аумақтарды газдандыру шараларын іске асыру көзделуде.
Сонымен қатар мобильді станциялар ТЭЦ-2-ні газға көшіру, қоғамдық көлікті жаңарту және жаңа экологиялық стандарттарды енгізу сияқты ірі экологиялық жобалардың тиімділігін объективті бағалауға мүмкіндік береді.
Осылайша, жоба ауа жағдайын бақылауға ғана емес, сонымен қатар ластану көздерін анықтауға және Алматыдағы экологиялық ахуалды жақсарту бойынша нақты шаралар қабылдауға мүмкіндік беретін жүйені қалыптастыруға бағытталған.
Дереккөз: Inform.kz