Алматыда 2025–2026 оқу жылының қорытындысы шығарылды, деп хабарлайды Almaty.news ақпарат агенттігі.
Алматы қалалық білім басқармасының басшысы Сәкен Аралбаевтың мәліметінше, мегаполисте 360 мектеп жұмыс істейді, оның 227-сі мемлекеттік, 133-і жекеменшік. Қалада барлығы 357 225 оқушы бар. Түлектер саны 17 187 адамды құрады. «Алтын белгі» белгісін 790 оқушы растады, үздік аттестатты 2 083 түлек алды. Сондай-ақ биылғы жылы ТиПО ұйымдарын 27 813 студент бітірді.
Биылғы тестілеуге Алматы мектептерінің 15 251 түлегі қатысты. Қала бойынша 1 990 он бірінші сынып оқушысы ҰБТ-ға қатысудан бас тартты. Ведомство бас тартудың негізгі себебі ретінде шетелдік жоғары оқу орындарына түсуді атайды.
— Оқу жылының алдын ала қорытындысы бойынша білім сапасы 68,7% құрайды (2024–2025 оқу жылында бұл көрсеткіш 65,8% болған). Жылдық бағалау нәтижелері бойынша білім сапасының оң динамикасы барлық деңгейде байқалады, — деді Сәкен Аралбаев Алматы РСК брифингінде.
Ведомствода сондай-ақ Алматы қаласының құрама командасы республикалық деңгейде жаратылыстану-математикалық бағыт бойынша 24-ші жыл қатарынан бірінші орын алғанын атап өтті.
Басқарма басшысы мектепке дейінгі білім туралы да айтты. Алматыда 1 097 балабақша жұмыс істейді (201-і мемлекеттік, 896-сы жекеменшік), онда 88 219 бала тәрбиеленеді. 2025 жылдың шілдесінде ваучерлік қаржыландырудың пилоттық жобасы іске қосылып, 2 жастан 6 жасқа дейінгі балаларды мектепке дейінгі оқытумен қамту 96,1%-ға жеткізілді. Пилот аясында ата-аналарға 200 мыңнан астам хабарлама жіберіліп, 115 мыңнан астам ваучер берілді. Экономикалық тиімділік 4 миллиард теңгені құрады.
Дереккөз: Inform.kz