Алматыда адам папиллома вирусына (ВПЧ) қарсы вакцинация бағдарламасы кеңейіп жатыр. Науқан басталғаннан бері 11 бен 13 жас аралығындағы 15 398 қызға екпе салынды, деп хабарлайды Almaty.news ақпарат агенттігі.
Вакцинациядан кейін ауыр жағымсыз реакциялардың бірде-бір жағдайы тіркелмеген. Алматы онкологиялық орталығы директорының орынбасары Райхан Болатбекованың айтуынша, бағдарлама ата-аналардың сенімі мен қамту көрсеткішін тұрақты түрде арттырып келеді.
2024 жылдың соңында 5077 қыз вакцинацияланса, 2025 жылы бұл көрсеткіш 7544-ке жетті, ал 2026 жылдың қаңтар-мамыр айларында тағы 2777 жасөспірім қорғалды. Бүкіл бақылау кезеңінде ауыр реакциялар тіркелмегені қолданылатын вакцинаның толық қауіпсіздігін дәлелдейді, — деді Райхан Болатбекова өңірлік коммуникациялар қызметінің брифингінде.
2026 жылдың мамырында Қазақстанда 14 пен 17 жас 11 ай 29 күн аралығындағы жасөспірім қыздарды қосымша вакцинациялау ресми басталды. Екпе ерікті түрде, ата-ананың жазбаша келісімімен салынады. Вакцинация мектеп, колледж медициналық кабинеттері мен емханаларда жүргізіледі.
Ең көп таралған қате пікір — вакцина бедеулікке әкеледі деген миф. Райхан Болатбекова бұл ғылыми тұрғыдан жоққа шығарылған ақпарат екенін атап өтті. Керісінше, вакцина жатыр мойны обырынан қорғау арқылы репродуктивті денсаулықты сақтайды. Вакцина тірі вирус жоқ және ауру тудырмайды. Ең тиімдісі — жыныстық өмір басталғанға дейін егу.
Алматы онкологиялық орталығының мәліметінше, жыл сайын 90 мыңнан астам әйел жатыр мойны обырына скринингтен өтеді. 2025 жылы осы диагнозбен 179 пациент есепке алынған, оның 60%-дан астамы бірінші сатыда анықталған.
Дереккөз: Inform.kz