Алматыда орташа жөндеу аясында 15 магистральдық көшенің учаскелерінде жұмыстар аяқталды, жалпы ұзындығы 32 км, деп хабарлайды Almaty.news ақпарат агенттігі.
Жол инфрақұрылымын дамыту басқармасының мәліметінше, Зенков, Жамақаев, Жетісу, Шемякин, Мәмбетов, Рысқұлбеков, Жанқожа батыр, Искендиров, Ақан Сері, Манас, Ғабдуллин, Жандосов, Центральная, Ушкемпіров көшелері мен Құлжа трактісінің учаскелерінде жөндеу аяқталды.
Жұбанов, Өтеген батыр көшелерінде және Алтынсарин мен Абай даңғылдарында асфальтбетонның төменгі қабаты төселді. Жоғарғы қабатты жақын арадағы демалыс күндері төсеу жоспарлануда. Асфальт төсеу аяқталғаннан кейін жол белгілері сызылады.
Орташа жөндеу аясында жол төсемі жүріс бөлігінің бүкіл ені бойынша жаңартылады. Сондай-ақ тротуарлар мен арық науаларының зақымдалған учаскелері жөнделеді.
Биыл барлығы 340 көшені, ұзындығы 250 км жөндеу жоспарланған. Бүгінгі таңда жұмыстар 70 пайызға орындалды. Орташа жөндеуді 31 қазанға дейін толық аяқтау жоспарлануда.
Сонымен қатар, Алматыда Ақжар, Боралдай және Рахат-Мәдениет шағын аудандарында жаңа жолдар құрылысы жалғасуда. Салынып жатқан жолдардың жалпы ұзындығы 96 км құрайды, оның 80 пайыздан астамы орындалды.
Еске салайық, 10 қыркүйекке дейін Алматы облысында «Астана — Қарағанды — Алматы» автожолының Жібек Жолы мен Қаскелең аралығындағы учаскесінде қозғалыс шектелген.
24 шілдеден 30 қарашаға дейін Шымбұлаққа қарай апаратын Медеу — Түйік-Су автомобиль жолында көлік қозғалысы уақытша шектеледі.
LRT құрылысына байланысты Момышұлы көшесінде Мөңке биден Төле би арқылы Абылай ханға дейінгі учаскеде көлік қозғалысының екі ортаңғы жолағы жабылған.