Алматыда Almaty SuperSki жобасы мен Алматы тау кластерін дамыту мәселелері талқыланды. Соңғы алты жылда тауларға келушілер саны 4,5 есе өсіп, жылына 1 млн адамға жеткен, ал 2026 жылы 1,5 млн-нан астам қонақ күтілуде, деп хабарлайды Almaty.news ақпарат агенттігі.
Әкімнің орынбасарының айтуынша, «Шымбұлақ» курорты ең қарбалас күндері 15 мыңға дейін адам қабылдайды, ал оның жобалық сыйымдылығы шамамен 6,5 мың адамға ғана шақталған.
Алдағы екі-үш жылда тау-шаңғы курорттарының өткізу қабілетін төрт есеге – тәулігіне 6 мыңнан 24 мың адамға дейін ұлғайту жоспарланып отыр.
Almaty SuperSki мен Алматы тау кластері таулы аумақтарды игеруді, туристік, спорттық және инженерлік инфрақұрылымды жаңғыртуды көздейді. Негізгі міндеттердің бірі – өсіп келе жатқан ағынды бірнеше локацияға бөлу және жыл бойы демалыс мүмкіндіктерін кеңейту.
Тау инфрақұрылымын дамытудың экономикалық әсері курорттардың өзінен әлдеқайда асып түседі. 2025 жылы Алматыда көрсетілген туристік қызметтер көлемі 110,9 млрд теңгеге жетті, салаға салынған инвестиция 198,8 млрд теңгені құрады, ал салық түсімдері 84 млрд теңге болды.
Сонымен қатар қазақстандықтардың ішкі туристік сапарларға жұмсаған шығыны 2025 жылы 659,2 млрд теңгеге жеткен. Бұл қаражат тек тұрғын үйге ғана емес, көлікке, тамақтануға, сауда-саттыққа және басқа да қызметтерге жұмсалады. Заманауи тау инфрақұрылымын дамыту осы шығындардың ел ішінде қалу үлесін арттырып, қонақүйлер, мейрамханалар, көлік, сауда, прокат, гидтер, нұсқаушылар және шағын және орта бизнестің басқа да өкілдері үшін қосымша сұраныс қалыптастырады.
Қазақстан үшін бұл – аймақтық туристік нарықтағы бәсекеге қабілеттілік мәселесі де. Көрші елдер өздерінің тау-шаңғы бағыттарын дамытуға белсенді инвестиция салып жатыр. Алматының маңызды артықшылығы – ірі мегаполис пен халықаралық әуежай тауларға тым жақын орналасқан.
Осылайша, Almaty SuperSki мен Алматы тау кластері тек инфрақұрылымдық жобалар ретінде ғана емес, ішкі және кіру туризмін дамыту, жұмыс орындарын құру және Алматы мен Қазақстанның қызмет көрсету экономикасын кеңейту құралы ретінде де қарастырылып отыр.