Almaty SuperSki жобасы аясында 60 шақырым трасса салынып, шамамен 5 мың тұрақты жұмыс орны ашылады, деп хабарлайды Almaty.news ақпарат агенттігі.
Kazakh Tourism Development басшысы Ержан Еркінбаевтың айтуынша, жобаның бір мақсаты – биік таулы аумақты жаяу жету қиын адамдар үшін қолжетімді ету. Сондай-ақ компания курортта оқушыларға арналған сабақтар өткізуді жоспарлап отыр. Еркінбаевтың сөзінше, бұл жылына кемінде 10 күн шаңғы сабағы болуы мүмкін.
Жоба 17 көтергішті, оның ішінде 11 заманауи арқан жолын қамтиды. Сонымен қатар курорт аумағында спорттық, туристік және сервистік инфрақұрылым пайда болады.
Жобалық қуатқа шыққаннан кейін Almaty SuperSki күніне 10 мыңға дейін қонақ қабылдай алады. Курорт жыл бойы жұмыс істеуі тиіс.
KTD жоба шамамен 5 мың тұрақты жұмыс орнын құрады деп күтеді – олар курорттың өзінде де, оның айналасындағы бизнесте де пайда болады.
Компания қосымша туристік ағын қонақүйлерге, мейрамханалар мен кафелерге, көлікке, дүкендерге, жабдықты жалға беруге, нұсқаушылар, гидтер және басқа да қызметтерге сұранысты арттырады деп күтеді.
KTD мынадай есеп келтіреді: егер жылдық ағын шамамен 1 млн турист болса, олардың әрқайсысы Алматыда орта есеппен үш күн өткізіп, тәулігіне шамамен $300 жұмсаса, жалпы шығыс көлемі жылына $1 млрд-қа жуықтауы мүмкін. Бұл қаражат тек курорттық инфрақұрылымға ғана емес, Алматыдағы қонақүйлерге, қоғамдық тамақтануға, көлікке, саудаға және ойын-сауыққа да жұмсалады деп күтілуде.
Тағы бір бағыт – кадрларды оқыту. Туризм және қонақүй бизнесі саласындағы мамандарды, сондай-ақ арқан жолдарының инженерлері мен қызметкерлерін, тау шаңғысы нұсқаушыларын, гидтер мен құтқарушыларды даярлауға 350 білім гранты бөлінеді деп жоспарланып отыр. Компания бұл кадрлық резервті алдын ала қалыптастыруға мүмкіндік беріп, жастарға кейін жұмысқа орналасу мүмкіндігімен кәсіп алуға жол ашады деп күтеді.
Келешекте Almaty SuperSki Алматыны халықаралық тау және тау шаңғысы туризмі орталығы ретінде дамытудың негізгі жобаларының біріне айналуы тиіс.