Алматы полициясы қала тұрғындары мен қонақтарын электрсамокаттарды пайдалану ережелерін сақтауға және жол-көлік оқиғаларына әкелуі мүмкін қауіпті бұзушылықтардан бас тартуға шақырды, деп хабарлайды Almaty.news ақпарат агенттігі Polisia.kz-ке сілтеме жасап.
Алматы қалалық полиция департаменті әкімшілік полиция басқармасының бастығы Әбдінұр Тасыбаевтың айтуынша, қалада бір электрсамокатта екі немесе тіпті үш адамның бір уақытта жүру жағдайлары жиілеген. Сонымен қатар, кейбір пайдаланушылар самокаттармен ірі габаритті жүктерді тасымалдайды.
Электрсамокат тек бір адамға арналған. Қосымша жолаушы немесе көлемді жүк көлік құралының тұрақтылығын нашарлатады, басқаруды қиындатады және құлау мен апат қаупін едәуір арттырады, — деді полиция өкілі.
Полиция жеке ұтқырлық құралдарын пайдаланушыларды қауіпсіздік талаптарына жауапкершілікпен қарауға, жол жүрісі ережелерін сақтауға және жолдың басқа қатысушыларын құрметтеуге шақырды. Сондай-ақ, полицейлер жол жүрісі ережелерін бұзу жауапкершілікке әкелетінін ескертті.
Дереккөз: Inalmaty.kz