Алматы облысы Қарасай ауданындағы Қасқыр тауында екі жасөспірім серуен кезінде маршруттан адасып, құтқарушылар оларды тауып алды, деп хабарлайды Almaty.news ақпарат агенттігі.
Төтенше жағдайлар министрлігінің мәліметінше, түнде Қасқыр тауында екі жасөспірім серуен кезінде маршруттан адасқаны белгілі болды.
«Байланыс үзілгенге дейін олар жолды өздігінен таба алмайтындарын айтып, көмек сұрады. Олармен соңғы байланыс телефонның толықтай дерлік разрядталуына байланысты үзілді», — деп мәлімдеді ТЖМ.
Іздеуге ТЖМ «Барыс» республикалық жедел-құтқару жасағының құтқарушылары дереу шықты. Іздеу-құтқару жұмыстары барысында жасөспірімдер Қасқыр тауының беткейінен табылды. Бақытымызға орай, оларға медициналық көмек қажет болмады.
Құтқарушылар балаларды қауіпсіз маршрутпен Өткел шатқалына дейін алып барып, содан кейін ата-аналарымен кездесу орнына жеткізді.
Дереккөз: Nur.kz