Алматы облысында камераға әдепсіз қимыл көрсетіп, мемлекеттік нөмірін жасырған жүргізуші әкімшілік жауапкершілікке тартылды, деп хабарлайды Almaty.news ақпарат агенттігі.
ІІМ ақпараттық медиапорталының мәліметінше, полиция қызметкерлері Алматы – Шелек – Хоргос автожолының 140-шақырымында бейнебақылау камерасын тексеру барысында көлік жүргізушісінің бұзақылық әрекетін тіркеген.
Бейнежазбада ер адам көлікпен камера жанынан өтіп бара жатып, оған қарай әдейі ортаңғы саусағын көрсеткені байқалады.
Жедел-іздестіру шараларының нәтижесінде тәртіп сақшылары көліктің орналасқан жерін анықтап, сұр түсті Mercedes-Benz автокөлігін тоқтатқан.
Жүргізушінің жеке басы анықталып, ол жауапкершілікке тартылды.
Сонымен қатар тексеру барысында ол камера алдында мемлекеттік тіркеу нөмірлік белгісін әдейі жасырғаны анықталған.
Осыған байланысты оған ҚР ӘҚБтК-нің тиісті баптары бойынша хаттамалар толтырылды.
Материалдар процестік шешім қабылдау және құқық бұзушыны жауапкершілікке тарту үшін сотқа жіберілді.