Алматы әуежайында 20 жастағы шетелдік азамат Бангкоктан Қазақстанға 11 кг гашиш майын әкелмек болып, полиция қызметкерлері мен ҰҚК шекара қызметінің бірлескен іс-шарасы кезінде ұсталды, деп хабарлайды Almaty.news ақпарат агенттігі.
ІІМ мәліметінше, Бангкок – Алматы рейсінің жолаушысын жеке қарау кезінде 12 пластик ыдыста жалпы салмағы шамамен 11 кг гашиш майы табылды. Оқиға бойынша Қылмыстық кодекстің 286-бабымен (есірткінің контрабандасы) іс қозғалды.
«Бұл баптың санкциясы 20 жылға дейін бас бостандығынан айыру немесе мүлкі тәркіленіп, өмір бойы бас бостандығынан айыруды көздейді», – деді ІІМ-нің Есірткі қылмысына қарсы күрес комитеті төрағасының орынбасары Елдар Әбдікенов.
Ұсталған адам уақытша ұстау изоляторына қамалды. Биылғы жылдың басынан бері Қазақстан аумағына есірткінің контрабандалық әкелінуінің 57 фактісінің жолы кесілген.
Дереккөз: Nur.kz