2026 жылғы сәуірде Алматы қаласында ҰҚК прокуратура органдарымен бірлесіп, телефон алаяқтығына қатысы бар қылмыстық топтың әрекетін тоқтатты. Олар шетелден қазақстандық абоненттерге байланыс операторларын айналып өтіп, халықаралық қоңыраулар жасау үшін жағдай жасаған, деп хабарлайды Almaty.news ақпарат агенттігі.
Алаяқтар жалған заңды тұлғалар арқылы виртуалды телефон станцияларын құрып, жергілікті мобильді нөмірлерді сатып алып, зиянды бағдарламаларды пайдаланған. Осы схема арқылы 4 миллионнан астам қоңырау жасалып, байланыс операторларына 15 миллион теңгеден астам шығын келтірілген.
Тінту кезінде техникалық құралдар мен өзге де заттай дәлелдемелер алынды. Тергеу жалғасуда. Қылмыстық-процестік кодекстің 201-бабы 1-бөліміне сәйкес өзге ақпарат жариялануға жатпайды.
Бұған дейін ҰҚК қазақстандықтардың жеке деректерін сатуға қатысты күдіктілерді ұстаған болатын.
Дереккөз: Inform.kz