Бұрынғы Верный әскери бекеті — Алматы тарихы басталған орын — бүгінде қоқысқа толы тасталған аумаққа айналған. Бұған дейін қала тұрғындары әлеуметтік желілерде тарихи нысанның жай-күйіне шағымданып, оны ретке келтіруді талап еткен еді, деп хабарлайды Almaty.news ақпарат агенттігі.
Бұрынғы Верный бекетінің аумағы Жетісу ауданында, Тәтібеков көшесінің бойында орналасқан. Бұл учаске бұрын жергілікті маңызы бар тарих және мәдениет ескерткіші ретінде танылған. Алайда бүгінде аумақ бірнеше бөлікке бөлініп, жеке меншікте.
Талқылауға себеп болған — алматылықтардың әлеуметтік желілердегі жарияланымдары, онда олар бекеттің қазіргі жағдайын көрсеткен. Фотосуреттерде — құрылыс және тұрмыстық қоқысқа толы бос учаскелер. Түсініктемелерде қала тұрғындары тарихи орынның қараусыз қалған түріне наразылық білдіріп, билікті аумақты ретке келтіруге шақырған.
«Мұнда үш казарма орналасқан, онда байланыс әскерлерінің батальоны тұрған. Асханасы мен клубы бар ғимарат, медициналық пункт болған. Батысырақта техникалық аймақ — «№4 қалашық» деп аталатын жерде байланыс техникасын сақтайтын ғимараттар тұрған», — деп еске алады бір қолданушы.
Басқалары тарихи бекеттен бұрыннан ештеңе қалмағанын — тек төбешік пен обелиск қана бар екенін айтады. Дегенмен, аумақты қайта жаңғырту идеялары да айтылуда. Бір тұрғын мұнда ескі Верныйдың бір бұрышын жасауды ұсынған: XIX ғасырдағы ағаш үйлерді көшіріп, қолөнер дүкендері мен сол кезеңнің атмосферасын сақтайтын кафелер ашу, ал сақталған ғимараттарда музей экспозициялары мен тарихи панорамалар орналастыру.
Верный бекеті 1854 жылы негізі қаланған. Бүгінде одан XIX–XX ғасырлардағы бірнеше ағаш құрылыс сақталған. Олардың кейбірі мемлекет қорғайтын ескерткіштер тізіміне енген.
Түсірілім кезінде біздің фотокорреспондент аумақтан қоқыс үйінділерін көрген. Бас кіреберіс жағындағы обелиск тазартылып, вазалар әктелген. Алайда қасына биік қоршау орнатылған, ол жалпы көріністі бұзады. Аумақ ескі металл құрылымдармен қоршалған, ал жақын жерде ағып жатқан Кіші Алматы өзенінің бойында — бұталар мен қоқыс.
Сақталған ғимараттардың көпшілігін жақыннан көру мүмкін емес: олар қоршаулардың артында жасырылған.
Бұған дейін қазақстандық блогер және гид Митя Байназаров Алматы қоғамдық кеңесі жанындағы мониторингтік топпен бірге бекет аумағына барып, оның өткені туралы айтқан. Оның сөзінше, нысанның тарихы 1854 жылдың көктемінде Заилий бекінісінің салынуынан басталған. Кейін ол «Верный бекінісі» атауын алған — бұл қасиетті шейіт София мен оның қыздары Вера, Надежда және Любовь күнінің құрметіне қойылған.
Бекініске ат қоралар, арсенал, күзет үйі, шіркеу және госпиталь кірген. Барлық құрылыстар жер үйіндісімен қоршалған, оның қалдықтарын әлі күнге дейін аумақтың солтүстік жағынан көруге болады. Кейін әскери нысандардың жанында Үлкен және Кіші станицалар пайда болған. 1856 жылы қасына Қазына бағы — қазіргі Орталық мәдениет және демалыс саябағы салынған. Ал 11 жылдан кейін Верный ресми түрде қалаға айналған.
Бүгінде бұрынғы бекет аумағының көп бөлігінде — қираған ғимараттар, бос жерлер және ретсіз қоқыс үйінділері.
Kazinform редакциясы Алматы әкімдігіне сұрау жолдап, бұрынғы Кіші станица аумағындағы жер учаскесі кімге тиесілі екенін және оны абаттандыру немесе қалпына келтіру жоспарлары бар-жоғын білмек болған. Алайда сұрау қайта бағытталған.
Дереккөз: Inform.kz