Қонақ үйлердегі ақылды гидтерден бастап камералар арқылы төбелесті анықтауға дейін — мегаполистің стартаптары әдеттегі қосымшалардан асып түсуде. Алматы технологияларға сүйенуде. Бүгінде еліміздегі IT-компаниялардың үштен бірі мегаполисте шоғырланған, ал қалалық стартаптар миллиондаған доллар инвестиция тартты. Технологиялар туристерге қалада тез бағдарлануға, маршруттар мен қызметтерді табуға көмектеседі, сондай-ақ бейнебақылау және жасанды интеллект арқылы қауіпсіздікті күшейтеді, деп хабарлайды Almaty.news ақпарат агенттігі.
Алматы – еліміздің басты туристік орталықтарының бірі. Өткен жылы қалаға 2,5 миллионға жуық адам келді. Осы жылдың бірінші тоқсанында ғана салаға 25 миллиард теңгеден астам қаржы салынды. Туризмді дамытуда IT-индустрия үлкен рөл атқарады. Мысалы, қазақстандық стартапердің платформасы қонақ үйлерде қажетті ақпарат алуға көмектеседі. Нөмірлер мен лоббидегі экрандардағы қысқа ЖИ-бейнелер қала туралы бәрін айтады: қонақ маршруттар, мейрамханалар, экскурсиялар мен қызметтер туралы тезірек біледі. Осылайша, жоба қала қазынасына айтарлықтай табыс әкеледі.
«Біз алдымен Алматы қаласының көрікті жерлерін, біздің серіктестерімізді, яғни Алматы қаласы Туризм басқармасын көрсетеміз. Алматы туризм бюросы, әріптестерге үлкен рахмет. Содан кейін біз қонақ үйдің қызметтерін өте егжей-тегжейлі, нөмірлердің барлық түрлерін, не жеуге болатынын, не тапсырыс беруге болатынын көрсетеміз. Ал нативті интеграцияларға орын қалады, яғни шағын және орта бизнес пайда болады, олар қонаққа пайда әкеле алады», — деді стартаптың негізін қалаушы Серік Ақышев.
Технологиялар ыңғайлылық емес, қажеттілікке айналған тағы бір сала – қауіпсіздік. Алматыда 186 мыңнан астам бейнебақылау камерасы орнатылған. Ал мектептер мен балабақшаларда олардың саны 17 000-нан асады. Олардың бір бөлігі тек бейнежазба жүргізеді, бірақ маңыздысы — сигналдың әрекет етуі тиіс адамдарға қаншалықты тез жетуі. Осы аяда қазақстандық стартап жеке қауіпсіздік қосымшасынан кеңірек платформаға көшті. Жоба бейнебақылауды ЖИ-мен біріктіреді.
«Төбелес, буллинг, есінен тану, мысалы, біреу құлап қалса немесе өрт шықса, біз мұны анықтап, 3 секунд ішінде автоматты түрде хабарлай аламыз. Сонымен қатар, біз балалар мен студенттерге қосымшамызды пайдалануға рұқсат береміз, ол арқылы күнделікті check-in кезінде баланың эмоционалдық жағдайын, мысалы, суицидке бейімділігін, депрессиясын бақылаймыз. Егер бала тәуекел аймағында екенін көрсек, психологтарға, ата-аналарға хабарлап, күрделі жағдайлардың алдын алуға көмектесеміз», — деп бөлісті стартаптың негізін қалаушы Аружан Меде.
Мұндай жобалардың пайда болуы Алматыдағы IT біртіндеп әдеттегі қосымшалар мен маркетплейстерден асып келе жатқанын көрсетеді. Қалалық стартап-экожүйе бүгінде 19 миллион доллардан астам инвестиция тартты, стартаптардың жиынтық табысы 5 миллиард теңгеден асты. Салада 7 000-ға жуық жұмыс орны құрылды. Жоспарларда — технологиялық компанияларды одан әрі дамыту және жаңа инвестициялар тарту.
Дереккөз: Almaty.tv