Алматы мен Италия арасында опера көпірі орнады. Teatro Petruzzelli Қазақстанда Абай атындағы Қазақ ұлттық опера және балет театрымен бірге білім беру және қою жобасын іске қосты. Ынтымақтастықтың шыңы – «Итальянка в Алжире» операсының қойылымы, деп хабарлайды Almaty.news ақпарат агенттігі.
Teatro Petruzzelli мен Абай атындағы Қазақ ұлттық опера және балет театры бірлесіп, тек спектакль ғана емес, опера шеберлігінің толыққанды мектебін құруды көздейді. Бастаманы Қазақстандағы Италия елшілігі мен Алматыдағы Италия мәдениет институты қолдап отыр.
«Мен Алматыда болып, осы жобаны бастауға қуаныштымын. Бұл тек келесі жылы болатын спектакль қойылымы емес. Жоба аясында итальяндық және қазақстандық әртістер тәжірибе алмасатын резиденциялар болады. Бұл бастаманың ең басты құндылығы деп ойлаймын. Жалпы, бастамалар бір іс-шарамен аяқталмайды, ол өз жемісін беретін тұқым қалдыру идеясын көздейді», – деді Қазақстандағы Италияның Төтенше және Өкілетті Елшісі Антонелло Де Риу.
Жоба дәстүрлі шеберлік сабақтарынан тыс, толыққанды опералық ко-продукцияны іске асыруды, оның ішінде театр-серіктеске қойылымға қажетті барлық көркемдік және өндірістік материалдарды беруді қамтиды. Жобаның режиссері – Джандоменико Ваккари.
«Біз бүгін Джоаккино Россинидің «Итальянка в Алжире» спектакліне негіз дайындау үшін осындамыз. Бұл опера 1813 жылы жазылған, бірақ оны көргенде, оның қаншалықты өзекті екенін және сипатталған ессіздіктің бүгінгі күні де түсінікті екенін түсінесіз. Россинидің музыкасы – Италия мәдениетінің Қазақстандағы елшісі және Қазақстан мен Италия арасындағы мәдени байланыс үшін тағы бір көпір болады», – деді жоба режиссері Джандоменико Ваккари.
«Біз Алматыдағы Италия мәдениет институтымен бірнеше жыл тығыз жұмыс істеп келеміз. Осы ынтымақтастық аясында олар бізге айтарлықтай қолдау көрсетеді. Осы жылдың ақпан айында Италияда Petruzzelli театрымен бірге біздің жұмысымыз қойылды. Сонымен қатар, өткен жылдың қыркүйегінен бастап итальяндық мамандар бізге үнемі шеберлік сабақтарын өткізіп келеді. Дәл осы кездесулер барысында жас орындаушылардың қатысуымен жаңа опера жасау идеясы пайда болды», – деді Абай атындағы ҚазҰОБ директоры Айнұр Қопбасарова.
Білім беру бағдарламасы биылғы жылдың күзінде өтіп, Қазақстанның басты мәдени орталықтарының бірі – Абай театры сахнасында премьерамен аяқталады. «Итальянка в Алжире» спектаклінің премьерасы келесі жылы жоспарланған. Ұйымдастырушылар бұл тек мәдени оқиға ғана емес, жаһандық мәдени диалог пен кәсіби алмасудың бір бөлігі екенін атап өтті.
Дереккөз: Almaty.tv