18 шілдеде Алматыда корпоративтік «Смелость быть первым» қоры мен қала әкімдігінің қолдауымен өткен Summer Relay жазғы эстафеталық жүгірісінде 1300 адам бақ сынасты, оның ішінде 300 бала және 200 команда (әрқайсысында бес қатысушы) болды, деп хабарлайды Almaty.news ақпарат агенттігі.
Биылғы маршрут алғаш рет Алматының тарихи орталығы арқылы өтті. Қатысушылар Төле би, Қабанбай батыр, Панфилов көшелері мен Абылай хан даңғылы бойымен, қаланың белгілі мәдени және сәулет нысандарының жанынан жүгірді.
Басты қашықтық 10 шақырымдық командалық эстафета болды. Әрбір бес қатысушы 2 шақырымдық кезеңді еңсерді. Командалар ерлер, әйелдер, аралас, корпоративтік және кәсіби санаттар бойынша жарысты.
Жас қатысушылар үшін жас ерекшелігіне қарай 500, 1000 және 2000 метр қашықтықта жеке жүгірістер ұйымдастырылды. Жанкүйерлер мен қонақтарға арналған ойын-сауық алаңдары жұмыс істеді.
Іс-шара аясында экологиялық тәжірибелер жалғасты. Қайта өңделетін пластиктен жасалған пайдаланылған стақандар бөлек жиналып, одан әрі өңдеу үшін ECO Network серіктесіне берілді.
«Әлемнің көптеген қалаларында орталық көшелер ірі жүгіру шараларының алаңына айналады. Біз Алматының тарихи орталығы да спорт үшін кеңістік бола алатынын көрсеткіміз келді. Мұндай іс-шаралар тұрғындарға таныс көшелерді жаңаша көруге көмектеседі және қаланы туристер үшін ашады», — деді «Смелость быть первым» корпоративтік қорының атқарушы директоры Салтанат Қазыбаева.
Summer Relay 27 қыркүйекте өтетін 15-ші мерейтойлық Almaty Marathon-ға дайындық кезеңдерінің бірі болды. Биыл оның маршруты 2018 жылдан бері алғаш рет қаланың орталық және тарихи бөлігін қамтиды.
Дереккөз: Almaty.tv