Алматыда Kizdar.net интернет-ресурсын ұйымдастырушылардың қызметі тоқтатылды. Прокуратура мәліметінше, сайт жарнама орналастыру және ақылы интимдік қызмет көрсетуді ұйымдастыру үшін пайдаланылған, ал заңсыз кіріс 2 млрд теңгеден асқан, деп хабарлайды Almaty.news ақпарат агенттігі.
Тергеу нұсқасы бойынша, 2011 жылдан бастап сайт жарнама орналастыру және ақылы интимдік қызмет көрсетуді ұйымдастыру үшін пайдаланылған. Тергеу аясында ресурстың болжамды ұйымдастырушылары ұсталды. Олардың әрекеттері ҚР ҚК 309-бабының 2-бөлігі бойынша сараланған. Сот санкциясымен күдіктілер қамауға алынды.
Тінту кезінде құқық қорғау органдары ірі көлемдегі ақша қаражатын, цифрлық активтерді, компьютерлік техниканы және басқа да заттай дәлелдемелерді тәркіледі. Алдын ала мәліметтер бойынша, ресурс қызметінен түскен заңсыз кіріс 2 млрд теңгеден асқан.
Қазіргі уақытта сотқа дейінгі тергеу жалғасуда. Қылмыстық істің барысы Алматы прокуратурасының ерекше бақылауында.
Дереккөз: Inalmaty.kz