Фольклорлық-этнографиялық «Сазген сазы» ансамблі Венадағы әлемге әйгілі Musikverein концерт залында жеке концерт берді. Іс-шара Алматы қаласы әкімдігінің қолдауымен және Қазақстан Республикасының Австриядағы Елшілігінің көмегімен ұйымдастырылды, деп хабарлайды Almaty.news ақпарат агенттігі.
Концертке Қазақстанның халық әртісі Нұржамал Үсенбаева, Вена консерваториясының түлегі әрі Mahler Philharmoniker оркестрінің жетекші солисті Айгүл Шамшиденова және әнші Жеңіл Ержанов қатысты. Олар ансамбльдің сүйемелдеуімен көрерменге бағдарлама ұсынды.
Кеш «Қаражорға» күйімен ашылды, одан кейін Нұрғиса Тілендиевтің «Әлқисса» мен «Ата толғауы» туындылары және қазақ халық әндері орындалды. Еуропалық көрерменнің ерекше назарын ұлттық музыканың батыс классикасымен үйлесуі аударды: Моцарт пен Штраустың шығармалары қазақ халық аспаптарында орындалып, тыңдармандарға қатты әсер етті.
Ансамбльдің көркемдік жетекшісі, Қазақстан Республикасының еңбек сіңірген қайраткері Бағдат Тілегенов концерттің жоғары деңгейде ұйымдастырылғанын атап өтті. Оның айтуынша, қонақтар арасында 30-дан астам шетелдік елші, БҰҰ мен ЮНЕСКО-ны қоса алғанда, халықаралық ұйымдардың өкілдері, сондай-ақ австриялық мәдени және зияткерлік элита өкілдері болды.
Көрермендердің көптеген өтініші бойынша әртістер кешті бірнеше шығармамен аяқтады. «Сазген сазы» бұған дейін Қытай, АҚШ, Түркия, Франция, Германия және басқа елдерде сәтті өнер көрсетіп, қазақ мәдениетін халықаралық деңгейде лайықты таныстырған.
Дереккөз: Almaty.tv