Алматыдағы Al-Farabi даңғылында болған резонансты жол апаты бойынша сот алдын ала тыңдауы басталды. 32 жастағы кәсіпкер А. П. ҚР ҚК 345-бабының 4-бөлігімен айыпталып отыр, деп хабарлайды Almaty.news ақпарат агенттігі.
Сот процесін Алматы қаласы қылмыстық істер жөніндегі мамандандырылған ауданаралық сотының судьясы Еркін Майшинов жүргізуде. Айыпталушы А. П. алқабилердің қатысуымен істі қараудан бас тартты.
Қорғаушы айыпталушының денсаулығына байланысты (балдақпен жүреді) қашықтан қатысуына рұқсат сұрады. Сондай-ақ адвокат фото- және бейнетүсірілімді, тікелей эфирлерді шектеуді өтінді, себебі бұл айыпталушының үш кәмелетке толмаған баласына кері әсер етуі мүмкін.
Тыңдау барысында айыпталушы П. зардап шеккен тараптан кешірім сұрап, келтірілген шығынды өтеуге және одан әрі көмек көрсетуге дайын екенін білдірді. Сот басты сот талқылауын 2026 жылғы 1 маусымда сағат 10:00-де ашық режимде өткізуге шешім қабылдады. Айыпталушыға гибридті форматта қатысуға рұқсат етілді, ал фото- және бейнетүсірілімге тыйым салынды.
Айыптау мәні
Прокурор Әлібек Күмісбеков айыптау актісін оқыды. Тергеу деректері бойынша, 2026 жылғы 21 наурызда 1993 жылы туған А. П. мас күйінде, жалған мемлекеттік нөмірлермен көлік жүргізген. Ол Al-Farabi даңғылымен батыс бағытта жылдамдықты 80 км/сағ-тан асырып, Мендіқұлов көшесінің қиылысында қарсы жолаққа шығып, шығыс бағытта келе жатқан Mercedes көлігімен соқтығысқан. Салдарынан 1996 жылы туған Mercedes жүргізушісі және 2003, 2005 жылдары туған екі жолаушы қаза тапты.
Прокурордың айтуынша, айыпталушының қанынан 1,30 промилле этил спирті табылған (жеңіл мас болу дәрежесі). Кешенді сот сараптамасына сәйкес, Zeekr көлігінің соқтығысу алдындағы жылдамдығы шамамен 219 км/сағ болған.
Зардап шеккен тараптың ұстанымы
Зардап шеккен тараптың адвокаты Мейірман Қалмаханұлы айыпталушының туыстары қайғылы оқиғадан кейін кешірім сұрап, үйлеріне келгенін, бірақ келісімге қол жеткізілмегенін айтты. Отбасы 100 миллион теңге көлемінде материалдық және моральдық шығынды өтеу туралы азаматтық талап дайындап жатыр.
«Біз шамамен 100 млн теңге сұраймыз деп ойлаймыз. Бұл қайтыс болған адамның несиелері мен қарыздарына байланысты. Барлық мән-жайларды қосымша зерттеп, соңғы соманы айтамыз», — деді адвокат.
Ол тағы бір зардап шеккен тараптың татуласуға келіскенін, бірақ басқалары туралы толық ақпарат жоқ екенін атап өтті. Айыптау бабы 7 жылдан 10 жылға дейін бас бостандығынан айыруды көздейді. Адвокаттың сөзінше, жекелеген зардап шеккендермен татуласу айыпталушыны жауапкершіліктен босатпайды.
Дереккөз: Inform.kz