2026 жылдың басынан бері Алматыда алкогольдік масаң күйде 224 қылмыс жасалды, оның ішінде денсаулыққа ауыр зиян келтірудің 97 фактісі тіркелді, деп хабарлайды Almaty.news ақпарат агенттігі.
Осыған байланысты Алматы қалалық полиция департаментінің алдын алу жұмыстарын үйлестіру басқармасының қызметкерлері Алмалы ауданы полициясымен бірлесіп, алкоголь өнімдерін сататын сауда нысандарының иелері мен сатушыларымен профилактикалық кездесулер өткізуде.
Кезекті іс-шара барысында полиция өкілдері кәсіпкерлерге алкоголь сатуды реттейтін заңнама талаптарын және оларды бұзғаны үшін жауапкершілікті еске салды. Алкоголь өнімдерін сату ережелерін сақтауға және құқық бұзушылықтардың алдын алуға ерекше назар аударылды.
Алматы қалалық полиция департаментінің алдын алу жұмыстарын үйлестіру басқармасының бастығы Жандос Кавлиевтің айтуынша, алкогольдік масаң күйде жасалатын қылмыстардың едәуір бөлігі ауыр зардаптарға әкеледі.
— Әрбір мұндай қылмыс — бұл адам трагедиясы, оны көбінесе болдырмауға болар еді. Біздің міндетіміз — тек салдарына әрекет ету емес, сонымен қатар себептердің алдын алу. Сондықтан алкоголь өнімдерін сататын сауда субъектілерімен профилактикалық жұмыс полиция қызметінің маңызды бағыттарының бірі болып қала береді, — деп атап өтті ол.
Бұған дейін Түркістан облысында 800-ге жуық ауылдың 88-і алкоголь өнімдерін сатудан толық бас тартқаны белгілі болған еді.
Дереккөз: Inform.kz