Үлкен Алматы көліне (БАО) электросамокатпен немесе жеке көлікпен жету әлі де мүмкін емес, деп хабарлайды Almaty.news ақпарат агенттігі.
Медеу филиалының Үлкен Алматы орман шаруашылығының орманшысы Мұрат Рысқұлдың айтуынша, көлге қарай көлік қозғалысына қатаң шектеулер туристердің қауіпсіздігі үшін енгізілген.
— Көлге апаратын жол күрделі таулы жер бедерімен өтеді: тік еңістер, шектеулі көріну, тас құлау қаупі бар учаскелер. Әртүрлі көлік түрлері араласқанда апат қаупі күрт артады. Біз жол-көлік оқиғалары мен жарақаттану жағдайларын, оның ішінде жалға алынған электротранспортпен туристердің қатысуымен болған оқиғаларды тіркейміз, — деді Мұрат Рысқұл Алматы қалалық коммуникациялар қызметінде өткен баспасөз мәслихатында.
Оның сөзінше, тексерулер барысында бұзушылықтар да анықталады: туристер нұсқаушыларсыз электробайктермен жүреді, жолдан тыс жерлерге шығып, табиғи жамылғыны зақымдайды.
— Мұндай жағдайлар адамдар үшін қауіпті ғана емес, сонымен қатар экожүйеге зиян келтіреді. Сондықтан уәкілетті органдармен бірлесіп бақылауды күшейттік, рейдтік іс-шаралар мен кезекшіліктер енгіздік. Бұл мәжбүрлі шара, тек қауіпсіздікке бағытталған, — деп атап өтті Мұрат Рысқұл.
Жалпы, ұлттық паркте қауіпсіздікті қамтамасыз ету үшін кешенді жұмыс жүргізілуде. Маршруттарды инспекторлар патрульдейді, туристермен түсіндірме әңгімелер өткізіледі, ақпараттық тақталар мен бағыттауыштар орнатылып, жедел қызметтермен өзара іс-қимыл жолға қойылған. Бұған дейін Алматыдағы БАО-ға апаратын жол биыл жөнделетіні хабарланған.
Дереккөз: Inform.kz