2026 жылғы 3 тамызда Алматыда қала әкімдігінің қолдауымен экологиялық мәдениетті, ақылға қонымды тұтынуды және қалдықтарды бөлек жинау жүйесін дамытуға бағытталған жаңа цифрлық құрал іске қосылды, бұл республикалық «Таза Қазақстан» бағдарламасы аясында жүзеге асырылуда, деп хабарлайды Almaty.news ақпарат агенттігі.
ECO Network цифрлық платформасының тұсаукесері Арбаттағы экологиялық фестивальде өтті. Оны Алматы қаласы Экология және қоршаған орта басқармасы Бірінші Эко-Хаб және ECO Network жобасымен бірлесіп ұйымдастырды. Шараның дәл осы алаңда өтуі символдық мәнге ие, өйткені дәл бір жыл бұрын мұнда қаладағы қайта өңделген пластиктен жасалған тұңғыш орындық орнатылған еді.
Іс-шараға мемлекеттік мекемелердің өкілдері қатысты. Оларға жаңа цифрлық құралдың мүмкіндіктері таныстырылып, экологиялық бастамаға қосылу тетігі түсіндірілді. 3 тамыздан бастап мемлекеттік ұйымдардың қызметкерлері тұрмыстық қалдықтарды сұрыптап, оларды тұрақты түрде қайта өңдеуге тапсыру арқылы бағдарламаға қосыла алады. Цифрлық платформа ұйымдардың экологиялық бастамаларды іске асыруға қатысу деңгейін нақты уақыт режимінде бақылауға мүмкіндік береді.
Фото: Алматы қаласының әкімдігі
Болашақта платформаның функционалын кеңейту жоспарлануда. Жасанды интеллект технологияларын қолданатын жаңа сервистерді енгізу, сондай-ақ жүйеге бизнес өкілдерін, білім беру ұйымдарын, колледждер мен жоғары оқу орындарын қосу көзделуде.
Сондай-ақ, шара барысында қала тұрғындарына арналған екі жаңа экологиялық бастама таныстырылды. Олар Алматы қаласы Экология және қоршаған орта басқармасының қолдауымен экологиялық серіктестермен бірлесіп жүзеге асырылуда. Жобалар қалдықтарды бөлек жинауды дамытуға, қайта өңделетін шикізат көлемін ұлғайтуға және халықтың экологиялық мәдениетін арттыруға бағытталған.
Бірінші бастама – «Қайта өңделген пластиктен жасалған сіздің жиһазыңыз». Тұрғындар Марков көшесі, 44 және Satbayev University мекенжайларында орналасқан Эко-Хабтарға пластиктің жекелеген түрлерін, мысалы, пластик жеміс жәшіктерін тапсыра алады. Тапсырылған шикізат туралы ақпарат econetwork.me қосымшасында тіркеледі, ал қажетті көлем жинақталғаннан кейін қатысушылар оны қайта өңделген пластиктен жасалған бұйымдарға айырбастай алады.
Фото: Алматы қаласының әкімдігі
Екінші бастама – «Мен өз жерімді қорғаймын». Ол ұялы телефондар, планшеттер, электросамокаттар, дрондар және басқа да техниканың литий-ионды аккумуляторларын қауіпсіз жинауды және қайта өңдеуге тапсыруды көздейді. Қабылдау сол Эко-Хабтарда ұйымдастырылады, ал қабылданатын бұйымдардың толық тізімі econetwork.me қосымшасында орналастырылады. Ең белсенді қатысушыларға бағалы сыйлықтар қарастырылған.
Фото: Алматы қаласының әкімдігі
Дереккөз: Zakon.kz