Алматының Алатау ауданындағы Айгерим-1 шағын ауданында Пригородная көшесінде болған өрт салдарынан төрт адам зардап шегіп, ауруханаға жатқызылды, ал өрт 180 шаршы метр аумақта сөндірілді, деп хабарлайды Almaty.news ақпарат агенттігі.
Төтенше жағдайлар министрлігінің баспасөз қызметі хабарлағандай, өрт Алатау ауданындағы Айгерим-1 шағын ауданында Пригородная көшесіндегі үйде болған. Өртті сөндіру кезінде шатыр құлаған.
Кейін белгілі болғандай, бұл үй хостел ретінде пайдаланылған, ал иесі орынды заңсыз жалға берген. Бұл туралы КТК телеарнасы хабарлады.
Үйде 20-ға жуық адам тұрған. Әкімдіктің мәліметінше, олардың арасында студенттер мен бір ересек адам болған.
Оқиғаның себептерін мамандар анықтап жатыр. Аудандық әкімдік тұрғын үйсіз қалған отбасыларға уақытша баспана берілгенін мәлімдеді. Үй иесіне қатысты полиция тергеу бастады.
Бұған дейін елдің шығысында қайғылы оқиға болған. Өртте екі баласымен бірге әйел қаза тапты. Жергілікті тұрғындардың айтуынша, қаза тапқан балалар 1 жас 7 айда және 3 жаста болған.