Алматыда ҚР Көлік вице-министрі Дәмір Қожахметовке роботакси таныстырылды, деп хабарлайды Almaty.news ақпарат агенттігі.
Іс-шара Көлік министрлігінің интеллектуалды көлік жүйелерін дамыту және елде ұшқышсыз технологияларды енгізу перспективаларын зерделеу аясында өтті. Роботакси кезең-кезеңмен іске қосылады – пилоттық режимнен және шектеулі тестілеуден бастап. Бұл формат технологияларды қаланың нақты жағдайларын ескере отырып енгізуге мүмкіндік береді. Қызметте диспетчерлермен тәулік бойы байланыс және сапарларды сақтандыру жоспарланған. Ұшқышсыз көлікті басқару жүйесі автономды жүргізудің дәлелденген тәсілдеріне, соның ішінде жасанды интеллект, жол жағдайын тұрақты бақылау және қауіпсіз әрекет ету сценарийлеріне негізделеді. Тәжірибе жинақталып, жұмыс тұрақтылығы расталған сайын қызмет ауқымы кеңейтіледі.
Мемлекет басшысының тапсырмасы бойынша Көлік министрлігі роботаксиді пайдаланудың нормативтік базасын қалыптастыру бойынша жүйелі жұмыс жүргізуде. Негізгі ұғымдарды енгізу, роботаксиді пайдалану тәртібін айқындау, мемлекеттік органдардың өкілеттіктерін бөлу және қажетті құқықтық инфрақұрылымды құру көзделген заңнамалық түзетулер дайындалды.
Әлемдік тәжірибе ұшқышсыз технологиялардың бірқатар елдерде сәтті қолданылып жатқанын көрсетеді. Қазақстан үшін оларды енгізу экономиканың жоғары технологиялық салаларын дамытуға жаңа мүмкіндіктер ашады.
Пилоттық жобаларды іске асыру үшін ең перспективалы алаңдар ретінде цифрлық инфрақұрылымы дамыған және интеллектуалды көлік жүйелерінің қажетті элементтері бар Алматы және Астана қалалары қарастырылуда. Роботаксиді енгізу кезең-кезеңмен, барлық қауіпсіздік талаптарын міндетті түрде сақтай отырып жүзеге асырылады. Көлік министрлігі үздік халықаралық тәжірибені ескере отырып, заманауи көлік технологияларын енгізу үшін жағдай жасау бойынша жұмысты жалғастырады.
Дереккөз: Almaty.tv