Алматы көпсалалы клиникалық ауруханасының жақ-бет хирургиясы бөлімшесінің дәрігерлері науқас әйелдің жақасты аймағындағы алып ісікті сәтті алып тастады. Ол он жылдан астам уақыт бойы ісікпен өмір сүрген, деп хабарлайды Almaty.news ақпарат агенттігі.
АМКК баспасөз қызметінің мәліметінше, әйел ауруханаға ауырсыну, тыныс алудың қиындауы, ұйқының бұзылуы және мойын аймағындағы ірі түзілімге шағымданып түскен. Кешенді тексеруден және профессор Марат Ысқақовтың консультациясынан кейін мамандар шұғыл хирургиялық араласу туралы шешім қабылдады.
Ота барысында хирургтар ісікті жақасты сілекей безімен бірге алып тастады. Күрделі жағдайға қарамастан, араласу сәтті өтті — асқынуларсыз және өмірлік маңызды құрылымдардың зақымданбауымен.
Отадан кейін науқастың жағдайы айтарлықтай жақсарды, толыққанды тыныс алу қалпына келді. Барлық тексерулер мен хирургиялық ем міндетті әлеуметтік медициналық сақтандыру жүйесі аясында жүргізілді.
Мамандардың айтуынша, мұндай белгілерді ұзақ уақыт елемеу ауыр асқынуларға әкелуі мүмкін, сондықтан бас және мойын аймағында кез келген көлемді түзілім пайда болғанда уақытылы дәрігерге қаралу қажет.
Бұған дейін алматылық дәрігерлер науқас әйелдің құрсақ қуысында бірнеше ай бойы өскен салмағы 25 келіге жуық алып ісікті алып тастап, бірегей ота жасаған болатын.
Дереккөз: Inform.kz