Алматыда Балаларды қорғау күніне арналған қалалық фестиваль өтті. Биылғы шара цифрлық дағдыларды, шығармашылық қабілеттерді дамытуға және оқушыларды ерте кәсіби бағдарлауға арналды. Негізгі алаң Әлия Молдағұлова мен Мәншүк Мәметова ескерткіш сквері болды, онда 5 мыңға жуық бала жиналды, деп хабарлайды Almaty.news ақпарат агенттігі.
Қатысушылар үшін жеті тақырыптық аймақты қамтыған білім беру-ойын квесті ұйымдастырылды. Оқушылар робототехникамен, ғылыми зерттеулермен, медиаконтент жасаумен, сәндік-қолданбалы өнермен, киберспортпен және экологиялық жобалармен танысты.
Қонақтарды халықаралық және республикалық олимпиадалар мен байқаулардың жеңімпаздары сүйемелдеді. Сондай-ақ фестиваль аясында жедел қызметтердің техникасы көрсетіліп, алғашқы көмек көрсету бойынша шеберлік сыныптары және кинологтардың көрсетілімдік өнерлері өтті.
Фестиваль алдында жеті шығармашылық, спорттық және ғылыми-зияткерлік бағыт бойынша мектептік, аудандық және қалалық кезеңдер өтті. Байқау бағдарламасына барлығы 240,7 мыңнан астам оқушы қатысты. Қалалық кезеңге 2 571 оқушы жетті.
Фестиваль қорытындысы бойынша 1 335 жеңімпаз және жүлдегер анықталып, олар дипломдармен және естелік сыйлықтармен марапатталды. Олардың арасында ерекше білім беру қажеттіліктері бар балалар да бар.
«БАЛАFEST» фестивалі Алматыда 2022 жылдан бері өткізіліп келеді және дарынды балаларды қолдауға, жас ұрпақтың шығармашылық және зияткерлік әлеуетін дамытуға бағытталған.
Дереккөз: Zakon.kz