Алматының Наурызбай ауданында Алатау даңғылы бойында құрғақ шөптің өртенуі тіркелді, деп хабарлайды Almaty.news ақпарат агенттігі.
Telegram-арнада жарияланған ақпаратқа сәйкес, өрт Алатау даңғылы мен Төле би көшесінің қиылысындағы аумақта шыққан. Таратылған бейнежазбада жалынның жанында адамдар тұрған аялдама мен жақын маңда салынып жатқан тұрғын үйлер көрінеді.
Алматы қаласы Төтенше жағдайлар департаментінің баспасөз қызметі өрттің шыққанын растап, өрт сөндірушілердің оқиға орнына сағат 15:01-де жеткенін мәлімдеді.
«Келген соң ашық аумақта шамамен 150 шаршы метр жерде құрғақ өсімдіктердің жанғаны анықталды. Тұрғын үйлерге өрттің таралу қаупі болмады», — деп нақтылады департаментте.
Өрт сағат 15:25-те сөндірілді. Оқиға орнында 2 бөлімше мен 3 техника бірлігі жұмыс істеді.