Алматыда «2025 жылғы түркі әлемінің жастар астанасы» мәртебесі аясында қорытынды іс-шаралар өтті. Бес күн бойы Қазақстан, Түркия, Әзірбайжан, Қырғызстан, Өзбекстан және Түрікменстан жастары білім беру, диалог, экология, еріктілік және мәдени жобаларға қатысты, деп хабарлайды Almaty.news ақпарат агенттігі.
Іс-шаралар бағдарламасы Қазақстан Республикасының Президенті Қасым-Жомарт Тоқаев белгілеген негізгі басымдықтарды ескере отырып құрылды: цифрландыру және жасанды интеллект, «Заң және тәртіп» қағидаты, «Таза Қазақстан» экологиялық бастамасы және еріктілік қозғалысын дамыту.
Цифрландыру бағыты аясында Digital Turkic Youth халықаралық форумы өтті, оған Түркі мемлекеттері ұйымына мүше елдердің жастары мен сарапшылары қатысты. Технологиялық компаниялар мен білім беру ұйымдарының өкілдері жасанды интеллект, цифрлық технологиялар, болашақ құзыреттері және еңбек нарығының трансформациясын талқылады.
Адами капиталды дамыту тақырыбына Қазақстан мен Түркия сарапшыларын біріктірген Kazakhstan — Turkey Psychosocial Support Project халықаралық форумы арналды. Қатысушылар жастарға психоәлеуметтік қолдау, эмоционалдық тұрақтылық және дағдарыстық жағдайлардың алдын алу мәселелерін қарастырды. Сондай-ақ делегациялар Алматы Төтенше жағдайлар департаментіне барып, стресске төзімділік бойынша практикалық тренингке қатысты.
Спорт бағытында қатысушылар «Қайрат» футбол клубы академиясында жас спортшыларды даярлау жүйесімен танысты.
Орталық оқиғалардың бірі — Түркі мемлекеттері ұйымының халықаралық жастар кемпингі. Оның аясында Beyond Borders: Youth Without Borders сессиясы жастар дипломатиясы мен мәдениетаралық өзара іс-қимыл мәселелеріне, сондай-ақ цифрландыру, экология, еріктілік және қоғамдық даму салаларындағы бастамаларды әзірлеуге арналған Youth Solutions Lab хакатоны өтті.
Дереккөз: Nur.kz