Медеу ауданындағы тауларда адасып, өздігінен түсе алмаған туристерге құтқарушылар көмекке келді, деп хабарлайды Almaty.news ақпарат агенттігі. Оқиға Бутаков шатқалында, теңіз деңгейінен шамамен 2 900 метр биіктікте, канат жолы маңында болды. Жігіт пен қыз бағдарларын жоғалтып, қиын жағдайға тап болды.
ҚР ТЖМ «Барыс» республикалық құтқару қызметінің құтқарушылары «Медео» бекетінен шұғыл түрде жолға шықты. Іздеу ауданына жеткен соң, олар «Пионер» шаңғы кешені жағынан жаяу жолды жалғастырды. Қараңғы түскеніне және күрделі жер бедеріне қарамастан, құтқарушылар туристерді тауып үлгерді. Олардың жеңіл киінгені және қатты тоңғаны анықталды. Туристерге жылы киім берілді, олардың жағдайы қанағаттанарлық деп бағаланды — медициналық көмек қажет болмады.
Құтқарушылар туристерді таудан түсіріп, көліктеріне дейін жеткізді. Кейін оларды Бесқайнар ауылына апарды.
Дереккөз: Inalmaty.kz